پرەمەر-مينيستر ءاليحان سمايىلوۆتىڭ توراعالىعىمەن وتكەن قازاقستان ۇكىمەتىنىڭ وتىرىسىندا جىلىتۋ ماۋسىمىنا دايىندىق ماسەلەسى قارالدى، دەپ حابارلايدى "ادىرنا" ءتىلشىسى.
قىلىشىن سۇيرەپ كەلەر قىستىڭ دا اۋىلى الىس ەمەس. سوعان وراي، ەلدە جىلىتۋ ماۋسىمىنا دايىندىق جۇمىستارى قارقىندى جۇرگىزىلۋدە.
"ەلەكتر ستانتسيالارىندا 4 ەنەرگوبلوكتا، 25 قازاندىقتا، 23 تۋربينادا جوندەۋ اياقتالدى. ال 4 ەنەرگوبلوكتا، 27 قازاندىق پەن 16 تۋربينادا جوندەۋ جۇمىستارى ءارتۇرلى ساتىلاردا. جىلۋ بەرۋ كەزەڭىنە قازاندىقتى دايىنداۋ ءۇشىن 1073 قازاندى نەمەسە جوسپاردىڭ 90%-ىنا جوندەۋ جۇرگىزىلدى. ەلەكتر جەلىلەرىن جوندەۋ بەكىتىلگەن كەستەگە سايكەس اياقتالۋدا",- دەپ حابارلادى ەنەرگەتيكا ءمينيسترى بولات اقشولاقوۆ.
ايتۋلارىنشا، ەلەكتر ستانتسيالارىندا وتىن جيناقتاۋ جالعاسۋدا: ەنەرگيا كوزدەرى قويمالارىنداعى كومىر قورى 3,9 ملن توننانى جانە 83 مىڭ توننا مازۋتتى قۇرايدى، بۇل جالپى بەكىتىلگەن نورمالارعا سايكەس كەلەدى.
سونىمەن قاتار قاراعاندى، شىعىس قازاقستان وبلىستارىنداعى ەلەكتر ستانتسيالارىنىڭ نەگىزگى جابدىقتارىن جوندەۋ مەرزىمدەرىنىڭ ساقتالماعانى اتاپ وتىلەدى.
بۇدان باسقا، شىمكەنت قالاسىندا جانە قاراعاندى، ماڭعىستاۋ وبلىستارىندا كۇردەلى جوندەۋلەر 2023 جىلعا اۋىستىرىلدى.
ال ەلدەگى ءبىلىم بەرۋ نىساندارىنا كەلەر بولساق، بۇگىندە 11 075 ءبىلىم بەرۋ وبەكتىسى (جوسپاردىڭ 99%-ى) ) جانە 5 566 دەنساۋلىق ساقتاۋ نىسانى (98%) جىلۋ بەرۋ ماۋسىمىنا دايىن.
سونىمەن قاتار 42 383 تۇرعىن ۇيدە (88%) جوندەۋ جۇمىستارى اياقتالدى، سونداي-اق 11 مىڭنان استام دەربەس قازاندىق (97%), 1 176 كم جىلۋ جەلىلەرى (94%) جانە 2 031 كم سۋمەن جابدىقتاۋ جانە سۋ بۇرۋ جەلىلەرى (86%) جوندەلدى.
ايتا كەتەۋ كەرەك، كومىر ءوندىرۋشى كومپانيالار 2022 جىلعى قاڭتار-شىلدە ايلارىندا 66,4 ملن توننا كومىر ءوندىردى. بۇل وتكەن جىلدىڭ ءتيىستى كەزەڭىمەن سالىستىرعاندا 106%-دى قۇرايدى. بارلىق وڭىرلەردە كومىردىڭ قورى قاجەتتى مولشەردە جيناقتالعان.
سونداي-اق سولتۇستىك قازاقستان وبلىسىنىڭ اكىمى قۇمار اقساقالوۆ، اباي وبلىسىنىڭ اكىمى نۇرلان ۇرانحاەۆ، نۇر-سۇلتان قالاسىنىڭ اكىمى التاي كولگىنوۆ بايانداما جاسادى.
پرەمەر-مينيستر جالپى ءوڭىر اكىمدىكتەرى جىلىتۋ ماۋسىمىنا دايىندىق جۇمىستارىن كەستەگە ساي جۇرگىزىپ جاتقانىن ايتتى. قوستاناي، الماتى، قىزىلوردا، باتىس قازاقستان وبلىستارىنىڭ اكىمدىكتەرى الەۋمەتتىك سالا وبەكتىلەرى مەن تۇرعىن ۇيلەردى جىلىتۋ ماۋسىمىنا دايىنداۋ جوسپارىن 100% ورىندادى. دەگەنمەن، تۇرعىن ۇيلەردىڭ دايىندىعىن كەستەدەن كەشىكتىرۋ فاكتىلەرى دە بار. مىسالى، پاۆلودار وبلىسى.
«حالىققا جىلۋ ۋاقىتىمەن بەرىلىپ، كومىر جەتكىزۋگە بايلانىستى پروبلەما بولماۋى ءتيىس. كومىر تاپشىلىعى جىل سايىن قايتالاناتىن ۇيرەنشىكتى جاعدايعا اينالىپ بارادى. كومىر باعاسىنىڭ كۇرت ءوسۋى، ۋاقىتىندا جەتكىزىلمەۋى، وڭىرلەردە كومىر قورىن دەر كەزىندە جيناپ الماۋ – وسىنىڭ بارلىعى حالىقتىڭ نارازىلىعىنا الىپ كەلەدى. بۇعان جول بەرۋگە بولمايدى»، — دەدى ءاليحان سمايىلوۆ.
پرەمەر-مينيستر جىلىتۋ ماۋسىمىنا دەيىن از عانا ۋاقىت قالعانىن اتاپ ءوتتى.
«سولتۇستىك وڭىرلەرگە سۋىق ەرتە تۇسەدى. سوندىقتان جىلىتۋ ماۋسىمىن قىركۇيەكتىڭ سوڭىندا باستاۋ جوسپارلانعان. دەمەك، دايىندىق جۇمىستارىن بارىنشا تەزدەتۋ قاجەت. بارلىق وبەكتىلەردىڭ جىلىتۋ ماۋسىمىنا دايىندىعى بويىنشا جۇمىستىڭ اياقتالۋىن باقىلاۋدى قامتاماسىز ەتۋ كەرەك. بۇل ماسەلە ۇكىمەتتىڭ تۇراقتى باقىلاۋىندا بولادى»، — دەپ تۇيىندەدى ءاليحان سمايىلوۆ.
«ب
