قازاقستان رەسپۋبليكاسىنىڭ پرەمەر-ءمينيسترى ءاليحان سمايىلوۆ الماتىعا جۇمىس ساپارى كەزىندە WorldSkills Almaty-2022 وڭىرلىك چەمپيوناتىنىڭ جەڭىمپازدارىمەن كەزدەستى. بۇل تۋرالى ول Facebook پاراقشاسىنا جاريالادى، دەپ حابارلايدى “ادىرنا” ۇلتتىق پورتالى.
“وسىنداي تالانتتى جاستارعا قاراپ، ەلىمىزدىڭ بولاشاعى زور ءارى سەنىمدى قولدا ەكەنىن كورۋگە بولادى.
كەشە الماتىعا جۇمىس ساپارى كەزىندە WorldSkills Almaty-2022 وڭىرلىك چەمپيوناتىنىڭ جەڭىمپازدارىمەن كەزدەستىم.
WorldSkills – جۇمىسشى ماماندىقتاردىڭ بەدەلىن ارتتىرۋ مەن ولاردى دارىپتەۋ ماقساتىندا وتكىزىلەتىن الەمدىك چەمپيونات. ول 80-نەن استام ەلدى قامتيدى.
بۇل ستۋدەنتتەر قازىردىڭ وزىندە قازاقستاندىق ءىرى كومپانيالاردان جۇمىسقا شاقىرۋ العان، ەرتەڭىنە سەنىممەن قارايدى.
جوعارى ستاندارتتارعا ساي كاسىبي شەبەرلىككە يە تالانتتى ستۋدەنتتەر وزىنەن كەيىنگى بۋىنعا جاقسى ۇلگى كورسەتىپ، تۋعان ەلىنىڭ دامۋىنا ۇلەس قوسادى دەپ سەنەمىن”، - دەپ جازدى.
“ادىرنا” ۇلتتىق پورتالى
