اقتاۋدا جاتتىقتىرۋشى 5 جاسار قىزدى زورلاپ كەلگەن. بۇل تۋرالى كىشكەنتاي قىزدىڭ تۋىسقان اپكەسى «نەمولچي.Kz» قورىنا مالىمدەگەن، دەپ حابارلايدى "ادىرنا" ۇلتتىق پورتالى azattyq-ruhy.kz-كە سىلتەمە جاساپ.
قور وكىلدەرىنىڭ ايتۋىنشا، سەنىم تەلەفونىنا حابارلاسقان بويجەتكەن 5 جاسار جيەنىن جاتتىعۋ كەزىندە جاتتىقتىرۋشى بىرنەشە رەت زورلاپ، ازعىندىق جاساعانىن جەتكىزگەن.
بەلگىلى بولعانداي، اناسى قىزىنىڭ الدەنەگە ۇشىراعانىن ءتۇسىنىپ، انىقتاپ سۇراعاندا، بالا كاراتەدەن جاتتىقتىرىپ جۇرگەن 19 جاستاعى ەر ادامنىڭ ارەكەتى تۋرالى بار شىندىقتى ايتىپ بەرگەن.
«جاتتىقتىرۋشى قىز بالاعا اتا-اناسىنا ەشتەڭە ايتپاۋدى بۇيىرىپ، بۇل ەكەۋىنىڭ ءوزارا قۇپياسى ەكەنىن ايتقان. ءسويتىپ، كىشكەنتاي قىز باپكەردىڭ ايتقانىن ورىنداپ جۇرگەن. بالا ورتالىققا 2021 جىلدىڭ قىركۇيەگىنەن باستاپ بارادى، اتا-اناسى ونى سوڭعى 3-4 ايدان بەرى زورلىققا ۇشىراپ كەلگەن دەپ ەسەپتەيدى»، - دەپ جازادى قور بەلسەندىلەرى.
ايتا كەتەرلىگى، كۇدىككە ىلىنگەن جىگىت 18 جاسىندا اشيحارا-كاراتەدەن الەم چەمپيونى بولعان، ال 2021 جىلدىڭ قىركۇيەگىندە بالالاردى جاتتىقتىرا باستاعان. ول قىسقا ۋاقىت ىشىندە بالالار مەن اتا-انالاردىڭ سەنىمىنە كىرىپ، ءوزىن جاعىمدى ادام رەتىندە كورسەتە بىلگەن.
«ادەتتە ساباق كەزىندە اتا-انالار بالالارىن زالدىڭ سىرتىندا كۇتىپ وتىرادى. سول جولى قىزدىڭ اناسى مەن تاعى ءبىر اتا-انا ءسال ەرتەرەك كەلىپ قالىپ، جاتتىقتىرۋشىنىڭ جوق ەكەنىن، ال بالالاردىڭ جۇگىرىپ، زالدا ويناپ جۇرگەنىن بايقايدى. ارتىنشا باپكەر بەينەكامەرا ورناتىلماعان كيىم اۋىستىراتىن بولمەدەن شىعادى، ونىڭ سوڭىنان قىز بالا شىققان. كىشكەنتاي قىزدىڭ تەرلەپ، شاشى ۇيپا-تۇيپا بولىپ قالعانى، كيىمى دە دۇرىس كيىلمەگەنى كورىنىپ تۇرعان. اناسى قىزىنان جاتتىقتىرۋشىمەن نە ءۇشىن كيىم اۋىستىراتىن بولمەدە جۇرگەنىن سۇراعاندا، قىزى «بۇل قۇپيا» دەپ جاۋاپ بەرگەن. جاتتىقتىرۋشى بۇل جايتقا قاتىستى قىزدىڭ جارىسقا قاتىسقىسى كەلىپ جىلاعانىن، ال ءوزىنىڭ ونى جۇباتقانىن ايتقان!» – دەيدى قور وكىلى.
بەلگىلى بولعانداي، قازىرگى ۋاقىتتا بالامەن پسيحولوگ جۇمىس ىستەپ جاتىر.
«بالا ءالى دە تەكسەرۋدى قاجەت ەتەدى. بۇل وقيعا قاتتى اۋىر تيگەندىكتەن، جاس انا كوز جاسىن توقتاتا الار ەمەس. انا دا كومەككە قاتتى ءزارۋ»، - دەيدى قور وكىلى.
اتالعان جايتقا بايلانىستى ماڭعىستاۋ وبلىستىق پوليتسيا دەپارتامەنتى پىكىر ءبىلدىرىپ، قىلمىستىق ءىس قوزعالعانىن ءمالىم ەتتى.
«اقتاۋ قالالىق پوليتسيا بولىمىنە ارىزدانعان ايەل كىشكەنتاي قىزىنا قاتىستى ازعىندىق ارەكەتتەر جاساعان ازاماتقا شارا قولدانۋدى سۇرادى. اتالعان دەرەك سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە قر قىلمىستىق كودەكسىنىڭ 124-بابىنىڭ 3-بولىگى بويىنشا تىركەلدى»، - دەپ حابارلادى وبلىستىق دپ.
ۆەدومستۆو مالىمەتىنشە، كۇدىكتى ۇستالىپ، ۋاقىتشا ۇستاۋ يزولياتورىنا قامالدى.
سوت-مەديتسينالىق ساراپتاما تاعايىندالدى. تەرگەۋ مۇددەسى ءۇشىن قالعان مالىمەتتەر جاريالانبايدى.
"ادىرنا" ۇلتتىق پورتالى
