قوستانايداعى قارۋ-جاراق دۇكەنىندەگى جارىلىستان قازا بولعانداردىڭ ەسىمدەرى بەلگىلى بولدى، دەپ جازادى "ادىرنا" ۇلتتىق پورتالى قازتاگ-قا سىلتەمە جاساپ.
«وكىنىشكە وراي ءتورت ادامدى قۇتقارۋ مۇمكىن بولامدى. ولاردىڭ ەسىمدەرى ماڭگى جادىمىزدا ساقتالادى: ساتۋشى-كەڭەسشىلەر ەفيموۆ يۋري دميتريەۆيچ، نەۆودنيچي الەكساندر بوريسوۆيچ، مۇرزابەكوۆ تەمىرلان ەرجانوۆيچ جانە قارۋ-جاراق شەبەرى كراۆچەنكو ۆياچەسلاۆ ۆيكتوروۆيچ»، - دەپ حابارلادى«ورۋجەينايا پالاتا» دۇكەنىنىڭ وكىلدەرى.
دۇكەن اكىمشىلىگى اڭشىلىققا ارنالعان ۇنتاقتالعان وق-ءدارى دە، دۇكەننىڭ باسقا دا تاۋارلارى مۇنداي كۇشتى جارىلىستىڭ شىعۋىنا تۇرتكى بولا الماعانى انىق دەپ وتىر. بۇگىندە وقيعانىڭ ءمان-جايى انىقتالۋدا، تەرگەۋ ءجۇرىپ جاتىر.
«اۆاريالىق-قۇتقارۋ جۇمىستارى 15 ساعاتقا سوزىلدى. سەگىز زارداپ شەگۋشىگە مەديتسينالىق كومەك كورسەتىلدى. دۇكەنگە كەلگەن بەس ادام، ساتۋشى-كەڭەسشى نەكراسوۆ نيكيتا يۋرەۆيچ جانە كاسسير دۋجيك سۆەتلانا ۆلاديسلاۆوۆنا امبۋلاتوريالىق ەمدەلۋدە. ديرەكتور بەسكروۆنىي سەرگەي ۆاسيلەۆيچ اۋىر حالدە جانساقتاۋ بولىمىندە جاتىر»، - دەلىنگەن حاباردا.
ەسكە سالساق، قوستانايداعى قارۋ-جاراق دۇكەنىندەگى ءورت 3 قىركۇيەك كۇنى باستالعان. بەلگىلى بولعانداي، دۇكەننىڭ جەرتولەسىندە 2 ادام قالىپ قويعان، ال قىزىل جالىن بىردەن 2 مىڭ شارشى مەتر اۋماقتاعى سەگىز تۇرعىن ءۇيدى جالماعان. 3 قىركۇيەكتە اتالمىش دۇكەننىڭ ديرەكتورى اۋرۋحاناعا جەتكىزىلگەن، ءورت ۇدەي تۇسكەن.
"ادىرنا" ۇلتتىق پورتالى
