وقۋ-اعارتۋ مينيسترلىگى ءبىلىم سالاسىندا ساپانى قامتاماسىز ەتۋ كوميتەتى "پەداگوگتى قورعاۋ" Telegram چاتىن ىسكە قوستى. بۇل تۋرالى ۆەدومستۆونىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
مالىمەتىن بويىنشا، بۇل چاتتا مۇعالىمدەر ءوز قۇقىعىنىڭ بۇزىلعانى تۋرالى حابارلاي الادى. مىسالى، مىندەتتەن تىس فۋنكتسيالارعا تارتۋ، شامادان تىس ەسەپ بەرۋ جانە ت.ب. تۋرالى.
"تەلەگرامداعى چاتقا كەلگەن بارلىق اقپارات تەكسەرىلىپ، ءبىلىم سالاسىندا ساپانى قامتاماسىز ەتۋ كوميتەتىنىڭ جانە اۋماقتىق دەپارتامەنتتەردىڭ ماماندارى وتىنىشتەرگە جەدەل تۇردە جاۋاپ بەرىپ، مۇعالىمدەرمەن بايلانىسادى", - دەلىنگەن حابارلامادا.
مينيسترلىكتىڭ مالىمەتىنشە، "پەداگوگ مارتەبەسى تۋرالى" زاڭعا سايكەس مۇعالىمدەر شامادان تىس ەسەپ بەرۋدەن بوساتىلدى. قازىرگى كۇنى پەداگوگتەر كۇنىنە تەك ەكى قۇجات قانا، ياعني سىنىپ جۋرنالىن مەن قىسقا مەرزىمدى (ساباق) جوسپارىن تولتىرۋى كەرەك.
"قۇجاتتاردىڭ ناقتى ءتىزىمى بار جانە ونى بارلىعى ساقتاۋى قاجەت. مەكتەپ اكىمشىلىگى مۇعالىمدەردەن باسقا قۇجاتتاردى تولتىرۋدى تالاپ ەتۋگە قۇقىعى جوق. ەگەر مۇعالىمدەردىڭ قۇقىعى بۇزىلعانى انىقتالسا، وندا كوميتەت ءتيىستى شارالاردى قابىلدايدى", - دەدى ءبىلىم سالاسىندا ساپانى قامتاماسىز ەتۋ كوميتەتىنىڭ توراعاسى ەرنۇر داۋەنوۆ.
سونىمەن قاتار، ول وڭىرلەردە اۋماقتىق دەپارتامەنتتەر جانىنان پەداگوگيكالىق ادەپ جانە مۇعالىمدەردىڭ قۇقىقتارىن قورعاۋ جونىندەگى كەڭەستەر جۇمىس ىستەيتىنىن ەسكە سالدى.
