تۇركىستان وبلىسىنىڭ تۇلەگى اقش-تىڭ 8 ۋنيۆەرسيتەتىنەن شاقىرتۋ الدى، دەپ حابارلايدى "ادىرنا" ۇلتتىق پورتالى.
تۇركىستان وبلىسىنىڭ كەلەس اۋدانىنا قارايتىن بىرتىلەك اۋىلدىق وكرۋگىندەگى №9 "كولتوعان" جالپى ورتا مەكتەبىنىڭ تۇلەگى - جانەركە زەيلبەكوۆا اقش-تىڭ 8 ۋنيۆەرسيتەتىنەن گرانت ۇتىپ الدى. اۋىلداسى ەراسىلدىڭ ايتۋىنشا، جانەركە 9-سىنىپتان باستاپ اعىلشىن ءتىلىن ۇيرەنۋگە دەن قويعان.
"ول نازارباەۆ ۋنيۆەرسيتەتىنە ءتۇسۋدى ارماندايتىن. ءدال سول ۋاقىتتا جانەركەگە كوپ ادام سەنگەن جوق. الايدا ول ەشكىمنىڭ پىكىرىن ەلەمەي، الدىنا قويعان ماقساتىنا جەتۋ ءۇشىن اعىلشىن ءتىلىن ءوز بەتىنشە ۇيرەنە باستادى. بۇدان جانەركەنىڭ قايسارلىعىن كورۋگە بولادى. "بولاشاق" باعدارلاماسى بويىنشا شەتەلدە وقىپ كەلىپ، اعىلشىن ءتىلىن ۇيرەتىپ جۇرگەن دياس جورابەكوۆتەن قاشىقتان ءدارىس الا باستادى. وسى ورايدا قاشىقتان وقۋىنا قولداۋ كورسەتكەن شولپان اپكەسىنە راحمەت ايتادى. دياس اعايدىڭ ايتۋىنشا، جانەركە از ۋاقىتتىڭ ىشىندە اعىلشىن ءتىلىن جوعارى دەڭگەيدە مەڭگەرىپ، ەركىن سويلەي الاتىن دارەجەگە جەتتى", - دەيدى ەراسىل.
ەراسىلدىڭ ايتۋىنشا، جانەركە 11-سىنىپتىڭ قىركۇيەك پەن جولتوقسان ايلارىندا ارنايى باعدارلامامەن شەت ەلدىڭ ۋنيۆەرسيتتەرىنە تەست تاپسىرعان.
"سونىڭ ناتيجەسىندە وعان شاقىرۋ كەلە باستادى. العاشقىسى - Boston Sufflok University. سول ۋاقىتتا جانەركەگە عانا ەمەس، اۋىل بولىپ قۋانعانىمىز ءالى كۇنگە ەسىمدە. كەيىن شاقىرۋ سانى كوبەيدى، ءدال قازىر جانەركەنىڭ قولىندا سەگىز شاقىرۋ بار. ونىڭ ارمانى - كومپيۋتەرلىك تەحنولوگيانى جەتىك مەڭگەرىپ، قازاقستاننىڭ دامۋىنا ۇلەس قوسۋ. جانەركە ۇشقان ۇياسىن ۇمىتپايدى. ول №9 "كولتوعان" مەكتەبىنىڭ ۇستازدارىنا ەرەكشە العىس ايتادى. سونىڭ ىشىندە مەكتەپ باسشىسى تۇرسىنبەكوۆا قالدىگۇل، سىنىپ جەتەكشىسى - باكيروۆا شىنار، اعىلشىن ءتىلى ءپانىنىڭ مۇعالىمى - جاكسىلىكوۆا شولپان اپايلارىنا راحمەت ايتادى. مەنىڭ ويىمشا اۋىلدا ءجۇرىپ تە شەتەلدىك وقۋ ورىندارىنا وقۋعا تۇسۋگە بولادى ەكەن. ونىڭ جارقىن دالەلى - جانەركە. ەڭ باستىسى، ەڭبەك ەتىپ، جالىقپاي وقىساق بولعانى", - دەيدى ەراسىل.
"ادىرنا" ۇلتتىق پورتالى
