Túrkistan oblysynyń túlegi AQSh-tyń 8 ýnıversıtetinen shaqyrtý aldy, dep habarlaıdy "Adyrna" ulttyq portaly.
Túrkistan oblysynyń Keles aýdanyna qaraıtyn Birtilek aýyldyq okrýgindegi №9 "Kóltoǵan" jalpy orta mektebiniń túlegi - Janerke Zeılbekova AQSh-tyń 8 ýnıversıtetinen grant utyp aldy. Aýyldasy Erasyldyń aıtýynsha, Janerke 9-synyptan bastap aǵylshyn tilin úırenýge den qoıǵan.
"Ol Nazarbaev ýnıversıtetine túsýdi armandaıtyn. Dál sol ýaqytta Janerkege kóp adam sengen joq. Alaıda ol eshkimniń pikirin elemeı, aldyna qoıǵan maqsatyna jetý úshin aǵylshyn tilin óz betinshe úırene bastady. Budan Janerkeniń qaısarlyǵyn kórýge bolady. "Bolashaq" baǵdarlamasy boıynsha shetelde oqyp kelip, aǵylshyn tilin úıretip júrgen Dıas Jorabekovten qashyqtan dáris ala bastady. Osy oraıda qashyqtan oqýyna qoldaý kórsetken Sholpan ápkesine rahmet aıtady. Dıas aǵaıdyń aıtýynsha, Janerke az ýaqyttyń ishinde aǵylshyn tilin joǵary deńgeıde meńgerip, erkin sóıleı alatyn dárejege jetti", - deıdi Erasyl.
Erasyldyń aıtýynsha, Janerke 11-synyptyń qyrkúıek pen joltoqsan aılarynda arnaıy baǵdarlamamen shet eldiń ýnıversıtterine test tapsyrǵan.
"Sonyń nátıjesinde oǵan shaqyrý kele bastady. Alǵashqysy - Boston Sufflok University. Sol ýaqytta Janerkege ǵana emes, aýyl bolyp qýanǵanymyz áli kúnge esimde. Keıin shaqyrý sany kóbeıdi, dál qazir Janerkeniń qolynda segiz shaqyrý bar. Onyń armany - kompıýterlik tehnologııany jetik meńgerip, Qazaqstannyń damýyna úles qosý. Janerke ushqan uıasyn umytpaıdy. Ol №9 "Kóltoǵan" mektebiniń ustazdaryna erekshe alǵys aıtady. Sonyń ishinde mektep basshysy Tursynbekova Qaldygúl, synyp jetekshisi - Bakırova Shynar, aǵylshyn tili pániniń muǵalimi - Jaksylykova Sholpan apaılaryna rahmet aıtady. Meniń oıymsha aýylda júrip te sheteldik oqý oryndaryna oqýǵa túsýge bolady eken. Onyń jarqyn dáleli - Janerke. Eń bastysy, eńbek etip, jalyqpaı oqysaq bolǵany", - deıdi Erasyl.
"Adyrna" ulttyq portaly
