قر قورعانىس مينيسترلىگى ساربازداردىڭ ءولىمى تەك اسكەردە عانا ورىن الىپ جاتقان جوق دەپ مالىمدەدى. بۇل تۋرالى "ادىرنا" ۇلتتىق پورتالى جازادى.
"سوڭعى كەزدەرى ەلىمىزدىڭ كۇشتىك قۇرىلىمدارىندا ورىن العان وزىنە-ءوزى قول جۇمساۋ فاكتىلەرىنىڭ جيىلەۋى ءتۇسىندىرۋدى قاجەت ەتەدى. اسكەري قىزمەتشىنىڭ ءولىمى تەك قارۋلى كۇشتەردە عانا ەمەس، باسقا دا اسكەر تۇرلەرىندە ورىن الىپ وتىر", - دەلىنگەن حابارلامادا.
قورعانىس مينيسترلىگىنىڭ مالىمدەۋىنشە، باعىنىستىلاردىڭ ءومىرى مەن دەنساۋلىعىنا ۇقك شەكارا قىزمەتى، ءىىم ۇلتتىق ۇلانى، مەملەكەتتىك كۇزەت قىزمەتى جانە توتەنشە جاعدايلار مينيسترلىگى دە جاۋاپتى.
"بەيبىت ۋاقىتتا اتالعان كۇشتىك قۇرىلىمدار قارۋلى كۇشتەردىڭ قۇرامىنا كىرمەيدى جانە قورعانىس مينيسترلىگى ولاردىڭ قاۋىپسىزدىگىن باقىلامايدى. وزىنە-ءوزى قول جۇمساۋ سياقتى شاراسىز قادامعا بارۋ ول ادامنىڭ تۋىستارى مەن جاقىندارى ءۇشىن ۇلكەن قايعى. كومانديرلەرگە دە جاۋىنگەردەن ايىرىلۋ اۋىر شىعىن. قارۋلى كۇشتەردە بولعان ءاربىر جاعدايدى اسكەري پوليتسيا قىزمەتكەرلەرى جانە باسقا دا قىلمىستىق قۋدالاۋ ورگاندارى مۇقيات تەكسەرەدى. تەكسەرۋ ناتيجەلەرى وزىنە-ءوزى قول جۇمساۋ كوپ جاعدايدا اسكەري قىزمەت وتكەرۋمەن بايلانىستى ەمەس ەكەنىن كورسەتتى. اسكەرگە شاقىرۋعا دەيىنگى كەزەڭدە اسكەري قىزمەتشىلەردى وسىنداي ارەكەتكە يتەرمەلەيتىن ءار ءتۇرلى ومىرلىك جاعدايلار كەزدەسەتىنىن ەسكەرۋ كەرەك", - دەپ مالىمدەدى مينيسترلىك.
"ادىرنا" ۇلتتىق پورتالى
