"ولىمنەن امان قالدىم. اللا تاعالانىڭ ماعان بەرگەنى كوپ. جيعان-تەرگەنىم دە كوپ. سونىڭ ءبارىن حالىققا ەسەلەپ قايتارۋىم كەرەك". بۇل پىكىردى ءماجىلىستىڭ ەكس-دەپۋتاتى بەكبولات تىلەۋحان نارتاي ارالبايۇلىنا بەرگەن سۇحباتىندا ايتتى، دەپ جازادى "ادىرنا" ۇلتتىق پورتالى.
"مەن رەسمي تۇردە 2021 جىلى جەلتوقساننىڭ 29-ى كۇنى پارلامەنتتەن كەتتىم. سول كەزدەگى سپيكەر نىعماتۋللين "بەكبولات تىلەۋحانعا راقمەت ايتامىز. ستامبۋلعا كەتىپ بارا جاتىر" دەدى. قازىر بۇكىلالەمدىك ەتنوسپورت كونفەدەراتسياسىندا ءبىلال ەردوعاننىڭ ورىنباسارى بولىپ جۇمىس ىستەپ ءجۇرمىن", - دەيدى بەكبولات تىلەۋحان.
ەكس شەنەۋنىك وسى كۇنگە دەيىن جيعان-تەرگەنىڭ حالىقپەن بولىسەتىنىن جەتكىزدى.
"60-قا قاراي بەت الدىق. 57-گە اياق باستىم. ابايدىڭ جاسىنا 2-3-اق جىلىم قالدى. ەندى وسىنداي كەزدە دەنساۋلىقتى تۇگەندەۋدەمىن. قايراتكەرلىگىمدى وتە ەرتە باستاعان اداممىن. كورگەنىم كوپ. ءبىراز قىزىقتى كوردىم. ەندى وسىنىڭ ءبارىن جازۋ كەرەك. ەلدىڭ ءبارى بۇل جەردەن عيبرات الۋ كەرەك. قاتەلىك بولدى. ارتىقشىلىعىمىز بولدى. كەمشىلىگىمىز بولدى. اللا تاعالانىڭ ماعان بەرگەنى كوپ قوي نەگىزى. سول بەرگەن نارسەنى حالىققا ەسەلەپ قايتارۋىمىز كەرەك. قولدا مۇمكىندىگىمىز بار، قابىلەتىمىز بار، بىلگەنىمىز بار... وسىنى بولىسپەسەك، وسىنى جاقسىلاپ تۇرىپ رەتتەپ بەرمەسەك... جاس تا ءبىراز جەرگە جەتتى", - دەيدى ول.
بەكبولات تىلەۋحان ولىمنەن امان قالعانىن ەسكە الىپ، بۇرىنعى ومىرىنە باعا بەردى.
"مەن 2020 جىلدىڭ 10-12 ماۋسىم كۇنى ءولىمنىڭ تابالدىرىعىن اتتاپ، بۇل دۇنيەگە كەرى قايتتىم. مەن كوۆيدتان ءولدىم دەپ ويلاعان ەدىم. 78 پايىز وكپە قابىنعان ەدى. قوشتاسىپ، ميراسىمدى ايتىپ قايتىپ كەلگەننەن كەيىن مۇلدەم باسقا وي كەلدى. كەيبىر نارسەگە جالا جاۋىپ، جاندى قيناپ جاتقان كەزدەرىم... قازىر كۇلكىم كەلەدى "سول كەزدە ءولىپ قالسام نە بولار ەدى" دەپ. جيعان-تەرگەنىم كوپ. پارلامەنتتە وتىراسىڭ، ساياساتپەن اينالىساسىڭ... مۇنىڭ ءبارى وتكىنشى نارسە ەكەن. نەگىزى ارتىندا قالاتىن نارسە - سەنىڭ تۆورچەستۆولىق مۇراڭ. قازاققا كەرەگى دە سول ەكەن", - دەيدى تىلەۋحان.
"ادىرنا" ۇلتتىق پورتالى
