"Ólimnen aman qaldym. Alla Taǵalanyń maǵan bergeni kóp. Jıǵan-tergenim de kóp. Sonyń bárin halyqqa eselep qaıtarýym kerek". Bul pikirdi Májilistiń eks-depýtaty Bekbolat Tileýhan Nartaı Aralbaıulyna bergen suhbatynda aıtty, dep jazady "Adyrna" ulttyq portaly.
"Men resmı túrde 2021 jyly jeltoqsannyń 29-y kúni Parlamentten kettim. Sol kezdegi spıker Nyǵmatýllın "Bekbolat Tileýhanǵa raqmet aıtamyz. Stambýlǵa ketip bara jatyr" dedi. Qazir Búkilálemdik etnosport konfederaııasynda Bilál Erdoǵannyń orynbasary bolyp jumys istep júrmin", - deıdi Bekbolat Tileýhan.
Eks sheneýnik osy kúnge deıin jıǵan-tergeniń halyqpen bólisetinin jetkizdi.
"60-qa qaraı bet aldyq. 57-ge aıaq bastym. Abaıdyń jasyna 2-3-aq jylym qaldy. Endi osyndaı kezde densaýlyqty túgendeýdemin. Qaıratkerligimdi óte erte bastaǵan adammyn. Kórgenim kóp. Biraz qyzyqty kórdim. Endi osynyń bárin jazý kerek. Eldiń bári bul jerden ǵıbrat alý kerek. Qatelik boldy. Artyqshylyǵymyz boldy. Kemshiligimiz boldy. Alla Taǵalanyń maǵan bergeni kóp qoı negizi. Sol bergen nárseni halyqqa eselep qaıtarýymyz kerek. Qolda múmkindigimiz bar, qabiletimiz bar, bilgenimiz bar... Osyny bólispesek, osyny jaqsylap turyp rettep bermesek... Jas ta biraz jerge jetti", - deıdi ol.
Bekbolat Tileýhan ólimnen aman qalǵanyn eske alyp, burynǵy ómirine baǵa berdi.
"Men 2020 jyldyń 10-12 maýsym kúni ólimniń tabaldyryǵyn attap, bul dúnıege keri qaıttym. Men kovıdtan óldim dep oılaǵan edim. 78 paıyz ókpe qabynǵan edi. Qoshtasyp, mırasymdy aıtyp qaıtyp kelgennen keıin múldem basqa oı keldi. Keıbir nársege jala jaýyp, jandy qınap jatqan kezderim... Qazir kúlkim keledi "sol kezde ólip qalsam ne bolar edi" dep. Jıǵan-tergenim kóp. Parlamentte otyrasyń, saıasatpen aınalysasyń... Munyń bári ótkinshi nárse eken. Negizi artynda qalatyn nárse - seniń tvorchestvolyq murań. Qazaqqa keregi de sol eken", - deıdi Tileýhan.
"Adyrna" ulttyq portaly
