تۇركىستان وبلىسىندا 10 قاپ قانت الىپ، جالعان تۇبىرتەك كورسەتكەن ەر ادام انىقتالدى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
«ورداباسى اۋداندىق پوليتسيا بولىمىنە جەرگىلىكتى تۇرعىن ارىزداندى. ايەل ادامنىڭ ايتۋىنشا، ونىڭ ازىق-تۇلىك دۇكەنىنەن تانىسى 10 قاپ قانت ساتىپ الىپ، جالعان تۇبىرتەك كورسەتكەن. جابىرلەنۋشىگە كەلگەن شىعىن كولەمى – 186 مىڭ تەڭگە.
اتالعان جايتتى پوليتسيا قىزمەتكەرلەرى قر قك-ءنىڭ 190-بابى (الاياقتىق) بويىنشا تىركەۋگە الدى. ءتارتىپ ساقشىلارى حابارلاما كەلىپ تۇسكەن بويدا دەرەۋ ىسكە كىرىستى. ولار قىلمىستى اشۋ ءۇشىن قاجەتتى شارالاردى جۇزەگە اسىردى»،— دەلىنگەن حابارلامادا.
پوليتسەيلەردىڭ جەدەل-ىزدەستىرۋ شارالارىنىڭ ناتيجەسىندە كۇدىكتى جاس جىگىت انىقتالدى. ول جەرگىلىكتى تۇرعىن بولىپ شىقتى. انىقتالعانداي، كۇدىكتى جىگىت وڭاي ولجالى بولۋدى كوزدەگەن. ول الدىن الا قاپتاردى الىپ، كولىگىنە سالىپ، سوڭعى قاپتى الاردا جالعان تۇبىرتەك كورسەتىپ، قانتتى الىپ، وقيعا ورنىنان كەتىپ قالعان. ال قاپتاعى قانتتى ساتىپ، اقشاسىن جاراتىپ جىبەرگەن.
قازىرگى تاڭدا كۇدىكتىگە قاتىستى سوتقا دەيىنگى تەرگەۋ امالدارى جۇرگىزىلۋدە. وبلىس پوليتسەيلەرى تۇرعىندارعا الاياقتىقتىڭ الدىن الۋ ءۇشىن ساق بولۋدى ەسكەرتەدى.
