كاسىپكەر اقجول تالعاتۇلى الەۋمەتتىك جەلىنى شۋلاتىپ كومپانياداعى بارلىق ايەلدەردى جۇمىستان شىعارعانىن مالىمدەدى، دەپ حابارلايدى “ادىرنا” ۇلتتىق پورتالى.
«Cوڭعى كۇندەرى مەنىڭ وقىرماندارىمدى تاڭعالدىرعان ەڭ ۇلكەن جاڭالىق – قىز بالالاردىڭ بارلىعىن جۇمىستان شىعارعانىم. ءبىزدىڭ كومپانيادا 22 ادام بولدى. قازىر تەك بەس ادام قالدى جانە ونىڭ ءبارى ۇلدار. بۇل قىزداردىڭ قۇقىعىن شەكتەۋ مە؟ جوق. بىلەسىزدەر، مەنىڭ تۇسىنىگىمدە، مال تابۋمەن ەر ادام اينالىسۋى كەرەك»، – دەيدى ول.
ونىڭ ويىنشا، قىز بالانىڭ ءوز جەتەر مۇراتى بار. جۇمىستى ەر ادام ىستەۋى كەرەك.
«قىز بالا ودان جوعارى. ەندى قاراڭىز، مەن ونى جۇمىستان شىعاردىم. مۇمكىن، ول باسقا جاققا بارىپ ءبارىبىر جۇمىس جاسايدى عوي دەگەن وي تۋى مۇمكىن. بىراق بۇل پروتسەستى بىرەۋ باستاۋ كەرەك قوي. ءبىر ەر ادام باستاۋى كەرەك. ەكىنشىدەن، سول مەن جۇمىستان شىعارعان قىزداردىڭ ءومىر تاريحىندا، ويىندا «سەن مۇنداي جۇمىسپەن اينالىسپا، سەن ودان جوعارىسىڭ دەپ» قالۋ كەرەك. كەزىندە جۇمىستان شىعارعان دەگەن وقيعانى سول قىزدار كەيىن تاريح قىپ ايتىپ وتىراتىن بولادى. وسىلاي وزگەرىس باستاماسى بولسىن دەپ، ەر ادامداردى ەڭبەككە شاقىرىپ، ال قىز بالالاردى ءوزىنىڭ مۇراتىنا ارناۋ ماقساتىندا وسىنداي ۇستانىمىمىزدى ءبىز ىسكە اسىرا باستادىق»، – دەگەن ول ۆيدەودا.
ادۆوكات جاننا مۇحامادي جۇمىستان بوساتىلعان ايەلدەرگە ونى سوتقا بەرۋگە كەڭەس بەردى.
«مەن بۇل قىزداردى تاۋىپ، كونستيتۋتسيالىق قۇقىقتارىنىڭ بۇزىلۋى بويىنشا وسى كاسىپكەردى سوتقا بەرگىم كەلەدى. تەگىنە، الەۋمەتتىك، لاۋازىمدىق جانە مۇلىكتىك جاعدايىنا، جىنىسىنا، ناسىلىنە، ۇلتىنا، تىلىنە، دىنگە كوزقاراسىنا، نانىمىنا، تۇرعىلىقتى جەرىنە بايلانىستى نەمەسە كەز كەلگەن وزگە جاعداياتتار بويىنشا ەشكىم ەشكىمدى كەمسىتۋىنە بولمايدى»،– دەپ جازدى ادۆوكات الەۋمەتتىك جەلىدەگى پاراقشاسىندا.
«ەڭ جامانى، ول بارشا كاسىپكەرلەردى ايەلدەردىڭ ءبارىن جۇمىستان شىعارۋ كەرەك دەگەن ماعىناداعى ءبىر فلەشموبقا شاقىرىپ وتىر. بۇگىندە اۋعانستان ايەلدەرىنىڭ ءبىلىم الۋ مەن جۇمىس ىستەۋ قۇقىعى شەكتەلگەن، ونى قورعايمىن دەگەندەرىن اتىپ ءولتىرىپ جاتىر. ال قازاقستاندا ايەلدەر جۇمىس ىستەي الماۋى ءۇشىن ولاردىڭ جۇمىستان شىعارىپ جىبەردى. سايكەستىك تىم كوپ ەمەس پە؟» – دەپ جازدى ادۆوكات.
“ادىرنا” ۇلتتىق پورتالى
