تەمىرجولشىلاردىڭ پارا بەرۋ ارەكەتى ۆيدەوعا ءتۇسىپ قالدى. "جولاۋشىلار تاسىمالى" اكتسيونەرلىك قوعامىنىڭ نۇر-سۇلتان قالاسى بويىنشا ۋچاسكەسىنىڭ باستىعى مەن ونىڭ ورىنباسارى زاڭسىز اقشا جيناعانى ءۇشىن جۇمىستان قۋىلدى. وعان قوسا، ءىرى كولەمدە ايىپپۇل تولەۋگە مىندەتتەلدى. بۇل تۋرالى قارجىلىق مونيتورينگ اگەنتتىگىنە مالىمدەدى، دەپ حابارلايدى “ادىرنا” ۇلتتىق پورتالى.
رەسمي مالىمەتكە سايكەس، پارامەن ۇستالعان باسشىلار "ەكسپرەسس" فيليالىندا جۇمىس ىستەگەن. ەكەۋى وزىنە قاراستى ۋچاسكە ارقىلى وتكەن "تۇلپار-تالگو" پويىزدارىن تەكسەرمەگەنى ءۇشىن اقشا تالاپ ەتكەن.
اگەنتتىكتىڭ نۇر-سۇلتان قالالىق دەپارتامەنتى زاڭبۇزۋشىلىقتى ۆيدەوعا ءتۇسىرىپ العان. وندا پويىز باسشىلارىنىڭ اقشا بەرىپ جاتقانى كورىنەدى. بىرەۋى قولما-قول بەرسە، ەندى بىرەۋى ۇستەلدىڭ ۇستىندە تۇرعان زاتتاردىڭ استىنا تىعىپ وتىرعان. بارلىعى 27 ەپيزود انىقتالدى.
"كىنالىلەر كوممەرتسيالىق ۇيىمداردا باسشىلىق قىزمەت اتقارۋ قۇقىعىنان ايىرىلا وتىرىپ، 6 ميلليون تەڭگەگە جۋىق ايىپپۇل تولەۋگە ءتيىس ", - دەيدى اگەنتتىك ماماندارى.
ال "جولاۋشىلار تاسىمالى" اكتسيونەرلىك قوعامىنا قىلمىستىق قۇقىقبۇزۋشىلىق جاساۋعا ىقپال ەتكەن ءمان-جايلاردى جويۋ تۋرالى ۇسىنىس ەنگىزىلدى.
ۆيدەونى تەلەگرام ارنامىزدان كورە الاسىز.
”ادىرنا” ۇلتتىق پورتالى
