وزبەكستان سىرتقى ىستەر مينيسترلىگى رەسەي اۋماعىندا ءوز ازاماتتارىنا قاتىستى رۇقساتسىز تەكسەرۋلەر مەن دورەكى قارىم-قاتىناس تۋرالى حابارلامالارعا بايلانىستى الاڭداۋشىلىق ءبىلدىردى. بۇل تۋرالى Gazeta.uz باسىلىمى جازدى، دەپ حابارلايدى “ادىرنا”.
مينيسترلىك مۇنداي ارەكەتتەر ەكى ەل اراسىنداعى دوستىق جانە وداقتاستىق قارىم-قاتىناسقا قايشى كەلەتىنىن مالىمدەپ، ولاردى بولدىرماۋ ءۇشىن ناقتى شارالار قابىلداۋ قاجەت ەكەنىن اتاپ ءوتتى. وزبەكستان تاراپى ءوز ازاماتتارىنىڭ قۇقىقتارى مەن مۇددەلەرىن قورعاۋدى سىرتقى ساياساتتاعى باسىم باعىتتاردىڭ ءبىرى دەپ سانايدى.
8 ماۋسىمدا ماسكەۋدىڭ ستروگينو اۋدانىندا قورعانىس مينيسترلىگىنە قاراستى ءبىر جاتاقحانادا ومون قىزمەتكەرلەرى ەڭبەك ميگرانتتارىنا قاتىستى رەيد جۇرگىزگەن. كۋاگەرلەردىڭ ايتۋىنشا، پوليتسيا قىزمەتكەرلەرى ەر ادامداردى بولمەلەرىنەن كۇشتەپ شىعارىپ، باياۋ قوزعالۋشىلارعا فيزيكالىق كۇش قولدانعان. تۇسىرىلگەن ۆيدەوجازبالاردا بەيادەپ سوزدەر مەن قورلاۋ ارەكەتتەرى انىق ەستىلگەن.
وزبەكستاننىڭ ماسكەۋدەگى ەلشىلىگى بۇل وقيعاعا بايلانىستى رەسەي تاراپىنا رەسمي ديپلوماتيالىق نوتا جولداعان. نوتادا بولعان وقيعاعا قۇقىقتىق باعا بەرۋ جانە وعان بايلانىستى تۇسىنىكتەمە بەرۋ سۇرالعان. مينيسترلىك بۇل جاعدايدى ادام قۇقىقتارىنىڭ ورەسكەل بۇزىلۋى دەپ باعالاپ، مۇنداي ارەكەتتەرگە جول بەرۋگە بولمايتىنىن مالىمدەدى.
وزبەكستان ءسىم وكىلدەرى رەسەيدىڭ ءتيىستى ورگاندارىن وزبەكستان ازاماتتارىنا قۇرمەتپەن قاراپ، ولاردىڭ ار-نامىسىن تاپتاماۋعا شاقىردى. سونىمەن قاتار، مينيسترلىك بۇل ماسەلەنى تۇراقتى باقىلاۋدا ۇستاپ وتىرعانىن جانە قاجەت بولعان جاعدايدا قوسىمشا شارالار قابىلداۋعا دايىن ەكەنىن جەتكىزدى.
رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا وزبەكستان ەلشىلىگى جىبەرگەن نوتاداعى مالىمەتتەردى مۇقيات قاراپ جاتقانىن راستادى. ونىڭ ايتۋىنشا، ەكى ەل اراسىنداعى سەنىمدى قاتىناس اياسىندا بارلىق تۇسكەن سيگنالدارعا اشىق جانە جاۋاپكەرشىلىكپەن قارالادى. ول سونداي-اق بۇل ماسەلە ءتيىستى رەسەيلىك مەكەمەلەرگە جولدانىپ، وبەكتيۆتى اقپارات وزبەك جاعىنا جەتكىزىلەتىنىن ايتتى.
سوڭعى ۋاقىتتا رەسەيدەگى ەڭبەك ميگرانتتارىنا قاتىستى رەيدتەر، تەكسەرۋلەر مەن قاتاڭ شارالار وزبەكستان، قىرعىزستان جانە تاجىكستان تاراپىنان بىرنەشە رەت سىنعا ۇشىراعان بولاتىن. بۇل جاعدايلار ورتا ازيا ەلدەرىنىڭ رەسەيمەن قارىم-قاتىناسىنا اسەر ەتىپ، ميگرانتتار قۇقىعىن قورعاۋ ماسەلەسىن كۇن تارتىبىنە شىعارىپ وتىر.
وزبەكستان بيلىگى وسى ماسەلەنى شەشۋ جولىندا ناقتى قادامدار جاساپ، حالىقارالىق قۇقىق نورمالارىنا ساي ارەكەت ەتۋدى تالاپ ەتۋدە.
