فوتو: جي
قازاقستاندا 2026 جىلدىڭ العاشقى توعىز ايىندا سكرينينگتىك تەكسەرۋلەر ناتيجەسىندە انىقتالعان قاتەرلى ىسىك جاعدايلارىنىڭ سانى وتكەن جىلدىڭ سايكەس كەزەڭىمەن سالىستىرعاندا 62%-عا ءوستى، دەپ حابارلايدى "ادىرنا" ءتىلشىسى.
بۇل تۋرالى دەنساۋلىق ساقتاۋ مينيسترلىگى حابارلادى.
مينيسترلىك مالىمەتىنشە، ەسەپتى كەزەڭدە قاتەرلى ىسىكتىڭ 3 016 جاعدايى انىقتالعان. ال بىلتىر وسى ۋاقىتتا 1 862 جاعداي تىركەلگەن.
انىقتالعان اۋرۋلاردىڭ باسىم بولىگى ءسۇت بەزى وبىرىنا تيەسىلى. بۇل دياگنوز 2 049 ايەلدەن تابىلعان. كورسەتكىش وتكەن جىلمەن سالىستىرعاندا 58,5%-عا ارتقان. سونداي-اق توق ىشەك پەن تىك ىشەك قاتەرلى ىسىگىنىڭ 590 جاعدايى انىقتالىپ، ءوسىم 78,8%-دى قۇرادى. جاتىر موينى وبىرىنىڭ 377 جاعدايى تىركەلگەن. بۇل وتكەن جىلعى كورسەتكىشتەن 57,7%-عا جوعارى.
سونىمەن قاتار اۋرۋدى باستاپقى كەزەڭدە انىقتاۋ ۇلەسى 70,3%-دان 71,6%-عا دەيىن وسكەن.
دەنساۋلىق ساقتاۋ مينيسترلىگىنىڭ دەرەگىنشە، توعىز ايدا ونكولوگيالىق سكرينينگتەن 3,23 ميلليوننان استام ادام وتكەن. بۇل تەكسەرىلۋگە جاتاتىن حالىقتىڭ 57,1%-ىن قۇرايدى.
قازىر قازاقستاننىڭ 20 وڭىرىندە سكرينينگ جۇرگىزۋدىڭ ورتالىقتاندىرىلعان جۇيەسى جۇمىس ىستەيدى. قاتەرلى ىسىككە كۇدىك تۋىنداعان ناۋقاستار ءۇشىن قوسىمشا دياگنوستيكالىق تەكسەرۋلەردەن جەدەل ءوتۋ ءتارتىبى قاراستىرىلعان.
