مەملەكەت باسشىسى قاسىم-جومارت توقاەۆتىڭ اتىنا اقش پرەزيدەنتى دجوزەف بايدەننەن حات كەلىپ ءتۇستى. قازاقستان پرەزيدەنتىنىڭ اتىنا كەلگەن حاتتا دجوزەف بايدەن سەمەي يادرولىق پوليگونىنىڭ جابىلعانىنا وتىز جىل تولۋىنا وراي قۇتتىقتاۋىن جەتكىزگەن، دەپ حابارلايدى "ادىرنا" ۇلتتىق پورتالى اقوردانىڭ ءباسپاسوز قىزمەتىنە سىلتەمە جاساپ.
– 29 تامىز كۇنى سەمەي يادرولىق پوليگونىنىڭ جابىلعانىنا 30 جىل تولۋىنا وراي امەريكا قۇراما شتاتتارىنىڭ اتىنان قازاقستان رەسپۋبليكاسىنىڭ حالقىنا ەڭ ىزگى قۇتتىقتاۋىمدى بىلدىرگىم كەلەدى. امەريكا قۇراما شتاتتارى بۇرىنعى سىناق پوليگونى ايماعىن قالپىنا كەلتىرۋ مەن ونىڭ قاۋىپسىزدىگىن قامتاماسىز ەتۋ بويىنشا ءسىزدىڭ ۇكىمەتىڭىزبەن اراداعى جالعاسىپ جاتقان ىنتىماقتاستىقتى قوسا العاندا، قازاقستانمەن بەرىك سەرىكتەستىگىن نىعايتا بەرمەك. امەريكا قۇراما شتاتتارى قازاقستاننىڭ تاۋەلسىزدىك العان العاشقى كۇنىنەن باستاپ سەمەي ايماعىندا ارىپتەستىك قارىم-قاتىناستا جۇمىستار اتقارىپ كەلەدى، – دەپ جازدى اقش پرەزيدەنتى.
دجوزەف بايدەن قاۋىپ-قاتەرلەردى بىرلەسىپ تومەندەتۋگە باعىتتالعان نانن-لۋگار باعدارلاماسى اياسىندا كەڭەستىك يادرولىق سىناق ينفراقۇرىلىمىنان قالعان مۇرانى جويۋ جولىندا قازاقستان مەن اقش-تىڭ بىرىگىپ جۇمىس اتقارعانىن ەسكە الىپ، ەكى ەلدىڭ دوستىعىن اتاپ ءوتتى.
– امەريكا قۇراما شتاتتارى ءسىزدىڭ ەلىڭىزدى دوس دەپ ماقتانا ايتادى جانە مەن سەرىكتەستىگىمىزدىڭ الەۋەتىن تولىق ءارى جەمىستى ىسكە اسىرۋ ءۇشىن سىزبەن جۇمىس ىستەۋگە دايىنمىن، – دەلىنگەن دجوزەف بايدەننىڭ حاتىندا.
ايتا كەتەيىك، 29 تامىز - يادرولىق سىناقتارعا قارسى ءىس-قيمىلدىڭ حالىقارالىق كۇنى رەتىندە اتاپ وتىلەدى. ەلباسىنىڭ 1991 جىلعى 29 تامىزداعى جارلىعىمەن سەمەي يادرولىق پوليگونى جابىلدى.
"ادىرنا" ۇلتتىق پورتالى
