فوتو: Depositphotos.com
رەسەيدە «ياندەكس» كومپانياسىنىڭ ءۇش ءىرى دەرەكتەر ورتالىعىنا درون شابۋىلى جاسالىپ، ولاردىڭ جۇمىسى بۇزىلعانى تۋرالى اقپارات تارادى. وسى وقيعادان كەيىن قازاقستانداعى Yandex Go تاكسي سەرۆيسىندە دە اقاۋلار بايقالىپ، كەيبىر پايدالانۋشىلار كولىك شاقىرا الماعان، دەپ حابارلايدى “ادىرنا” ۇلتتىق پورتالى.
قولدانۋشىلاردىڭ ايتۋىنشا، قوسىمشادا «بوس كولىك جوق» دەگەن حابارلاما شىعىپ، قىزمەتكە قول جەتكىزۋ قيىنداعان. رەسەيدەگى ىقتيمال تەحنيكالىق اقاۋلاردىڭ قازاقستانداعى سەرۆيسكە قالاي اسەر ەتكەنى جانە ەكى ەلدىڭ ينفراقۇرىلىمى اراسىنداعى بايلانىستىڭ دەڭگەيى ماسەلەسى نازارعا ىلىكتى.
قازاقستان زاڭناماسى بويىنشا، بەلگىلى ءبىر تالاپتارعا سايكەس ازاماتتاردىڭ دەربەس دەرەكتەرى ەل اۋماعىندا ساقتالۋى ءتيىس. 2023 جىلدىڭ جەلتوقسانىندا سول كەزدەگى تسيفرلىق دامۋ ءمينيسترى باعدات مۋسين «ياندەكس» كومپانياسىنىڭ سەرۆەرلەرى قازاقستانعا كوشىرىلگەنىن جانە قىزمەتتىڭ وسى ينفراقۇرىلىم ارقىلى جۇمىس ىستەيتىنىن مالىمدەگەن بولاتىن.
سول كەزدە مينيسترلىك ازاماتتاردىڭ دەرەكتەرىنىڭ قاۋىپسىزدىگىنە باسىمدىق بەرىلەتىنىن اتاپ وتكەن ەدى.
بۇعان قوسا، 2024 جىلدىڭ ساۋىرىندە كومپانيا بۇلتتى قىزمەتتەرىن قاراعاندىداعى دەرەكتەر ورتالىعىنا ورنالاستىرعانىن حابارلاعان. بۇل شەشىم جەرگىلىكتى پايدالانۋشىلارعا كورسەتىلەتىن قىزمەتتەردىڭ ساپاسىن جاقسارتۋعا باعىتتالعانى ايتىلعان.
الايدا رەسەيدەگى داتا-ورتالىقتارعا قاتىستى وقيعادان كەيىن قازاقستانداعى Yandex Go سەرۆيسىندە اقاۋلاردىڭ بايقالۋى جەرگىلىكتى ينفراقۇرىلىمنىڭ قانشالىقتى دەربەس جۇمىس ىستەيتىنى تۋرالى ساۋالداردى قايتا كوتەردى.
Threads جەلىسىندە قازاقستاندىقتار Yandex Go قوسىمشاسىنىڭ اشىلمايتىنىن نەمەسە تاپسىرىس قابىلدامايتىنىن جازىپ جاتىر. كەيبىر قولدانۋشىلار سەرۆيستىڭ باسقا قىزمەتتەرى دە ىستەمەي قالعانىن حابارلادى.
«قازاقستانداعى ياندەكسكە نە بولدى؟ اقىلدى ءۇي جۇمىس ىستەمەيدى، قوسىمشا اشىلمايدى، ادامدار تاكسي دە شاقىرا الماي جاتىر»، – دەپ جازدى جەلى قولدانۋشىلارىنىڭ ءبىرى.
تاعى ءبىر قولدانۋشى تاڭعى ساعات 09:00-دە ءىس-شاراعا بارۋى كەرەك ەكەنىن ايتىپ، تاكسيگە تاپسىرىس بەرە الماي وتىرعانىنا شاعىمدانعان.
Yandex Go Kazakhstan تەحنيكالىق اقاۋ بار ەكەنىن راستادى.
«قازىر كەي سەرۆيستەرىمىزدە تەحنيكالىق ماسەلەلەر تۋىنداپ، ولاردىڭ جۇمىسى ۋاقىتشا قيىنداۋى مۇمكىن. بۇل جاعدايدان حاباردارمىز. ماماندارىمىز سەرۆيستەر جۇمىسىن مۇمكىندىگىنشە تەزىرەك قالپىنا كەلتىرۋ ءۇشىن بار كۇشىن سالىپ جاتىر»، – دەلىنگەن كومپانيا حابارلاماسىندا.
كومپانيا قولايسىزدىق ءۇشىن كەشىرىم سۇراپ، جاعدايعا قاتىستى جاڭالىقتاردى رەسمي پاراقشالارىندا جاريالايتىنىن جەتكىزدى.
