شىمكەنتتە ەمشى 6 بالانى اسىراپ، ولاردى جۇمىسقا جەككەن. بۇل تۋرالى گۇلميرا ابىقاي الەۋمەتتىك جەلىدەگى پاراقشاسىندا جازبا جاريالادى، دەپ حابارلايدى “ادىرنا” ۇلتتىق پورتالى.
بىرنەشە جىلدار بۇرىن ۇلىقبەك ەمشى تۋرالى رەسپۋبليكالىق ارنالار “ارۋاقتى ەمشى” دەگەن حابار دايىنداعان ەكەن. جۋرناليستكە ەمشىنى تانيتىن قارىنداسى حات جازعان.
"ۇلىقبەك سمانوۆ وڭتۇستىك ءوڭىردىڭ ورداباسى اۋدانى، كوكبۇلاق اۋىلىندا تۋىپ وسكەن. اتا-اجەسىنىڭ قولىندا تاربيەلەنگەن ەكەن. ناقتى جاسى 51-دە. اجەسىنىڭ ايتۋىنشا بالا كەزدە كەشكىسىن بادام وزەنىنىڭ جاعاسىندا ۇيىقتاپ قالعان، سودان اۋىتقۋ باستالدى. كورشى-قولاڭ مازاقتاپ كۇلىپ، اتا-اجەسى “بالامىزدىڭ ءوز الەمى بار” دەپ قورعاشتادى. ەسەيە كەلە اۋىتقۋى اسقىنىپ، پسيح. ديسپانسەردە ەمدەلگەنى راس",- دەپ جازعان قارىنداسى.
كەيىن ەمشىلىكپەن اينالىسا باستاعانىن، ءتىپتى مەكتەپتە مۋزىكادان ساباق بەرگەنىن دە ايتتى.
"ارۋاق قوندى دەپ، ارقاسى قوزىپ، وزدىگىنەن ساعاتتاپ سويلەي باستايدى. زىكىر وقىپ، قامشىمەن دەم سالامىن دەپ ءجۇردى ءوزى. اراسىندا قازاق-اراب ۋنيۆەرسيتەتىن وقىدىم دەپ، 2010-شى جىلدارى وتىرار كوللەدجىندە مۋزىكادان ساباق تا بەرگەن. كەيىن ۇيلەنىپ، مال باعىپ، مالدى-جاندى بولىپ تۇرمىسى كوتەرىلدى",- دەلىنگەن حاتتا.
قارىنداسى اعاسىنىڭ ينديرا ەسىمدى جارى بار ەكەن، ول ەكەۋى اجەلەرىن استى-ۇستىنە ءتۇسىپ قاراعانىن دا جازعان.
"ول پسيح بولنيتسادا ۋچەتتا تۇرسا اسىراۋعا 6 بالانى كىم بەردى، نەگە بەردى، نەگە تەكسەرمەگەن؟ ءبىز تىپتەن بىلمەدىك بۇل ۇيدە 6 بالا بارىن، الدە، جۇيكە اۋىتقۋىن ءبىلىپ، باۋىرىمىزدى بىرەۋ پودستاۆيت ەتتى مە ەكەن؟ اقشاعا مۇقتاج ەمەس، مال-جانى بار ادام. ءومىر باقي قاراۋسىز مىسىق-كۇشىكتى جاعالاپ، ارتىنان شۇرقىراتىپ تاماق بەرىپ جۇرەتىن. ەگەر، 4 جىل بويى 6 بالاعا اقشا الىپ كەلسە ونى قايدا، كىم جۇمسادى ەكەن؟", - دەيدى ەمشىنىڭ قارىنداسى.
قازىر ۇلىقبەك سمانوۆ ەمدەۋ بولىمىنە جاتقىزىلدى. بالالار ۇيىنە حابارلاسقان 16 جاسار ۇل مەن قىز شىمكەنت قالالىق قيىن جاعدايعا تۇسكەن بالالاردى بەيىمدەۋ ورتالىعىندا. قالعان 4 بالا بوبەكتەر ۇيىنە ورنالاستىرىلعان.
بۇعان دەيىن شىمكەنتتەگى وتباسىنىڭ 6 بالانى اسىراپ العانى جايلى بالالار قۇقىقتارى جونىندەگى ۋاكىل دينارا زاكيەۆا جازعان.
مالىمەت بويىنشا، وتباسى اسىراندى 6 بالانى جىلدار بويى ازاپتاپ كەلگەن. ەمشىلىكپەن اينالىساتىن وتاعاسى بالالاردى جۋىندىرماي، اش قۇرساق ۇستاعان. يت پەن مىسىقتىڭ ەتىن جەگىزىپ، ءزارىن ىشكىزگەن.
«سارايلارىنا كىردىك. گاز بالللونىندا 32 مىسىق بايلاۋلى تۇر ەكەن. بالا بۇل مىسىقتى شەتىنەن سويىپ، بىزگە تاماق بەرەدى دەدى. مۇلدەم شومىلماعان، دەنەلەرىن قاسىعان. تۇندە بالالاردى قاسىنباسىن دەپ بايلاپ قويادى ەكەن»، — دەيدى جازىقباەۆا.
بۇلدىرشىندەردىڭ ءبىرى اتالعان وتباسىعا نەبارى 1,5 ايلىعىندا قامقورلىققا بەرىلگەن.
شىمكەنتتە ەمشى كامەلەت جاسىنا تولماعان 6 بالانى 2021 جانە 2023 جىلدارى قامقورلىعىنا العان. ولاردىڭ ەكەۋى سوت شەشىمىمەن ايەلى ەكەۋىنىڭ اسىراندى بالالارى سانالسا، قالعان تورتەۋى ءوزىنىڭ قامقورشىلىق تاربيەسىندە بولعان.
بالالاردىڭ ۇلكەنى - 2008 جىلدىڭ ساۋىرىندە دۇنيەگە كەلگەن ۇل بالا. 2021 جىلدىڭ 7 شىلدەسىندە شىمكەنت قالالىق ءبىلىم باسقارماسى باسشىسىنىڭ №344 بۇيرىعىمەن ەمشىگە قامقورشىلىققا بەرىلگەن. 2021 جىلدىڭ 12 قازانىندا شىمكەنت قالاسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىنىڭ شەشىمىمەن ءجاسوسپىرىمدى ەمشى مەن ونىڭ ايەلى اسىراپ العان.
2021 جىلدىڭ 17 مامىرىندا تۋعان قىز بالا 2021 جىلدىڭ 7 شىلدەسىندە استانا قالالىق ءبىلىم باسقارماسى باسشىسىنىڭ № 336 بۇيرىعىمەن قامقورشىلىققا بەرىلگەن. ەمشى مەن ونىڭ جۇبايى 2023 جىلدىڭ 30 قازانىندا ءبۇلدىرشىندى سوت شەشىمىمەن اسىراپ العان.
ءۇشىنشى جانە ءتورتىنشى پەرزەنت - 2021 جىلدىڭ 26 مامىرىندا دۇنيەگە كەلگەن ەگىز ۇل مەن قىز. ەگىزدەر 3 ايعا جەتەر-جەتپەس جاستا 2021 جىلدىڭ 18 تامىزىندا استانا قالالىق ءبىلىم باسقارماسى باسشىسىنىڭ № 436 بۇيرىعىمەن ەمشىگە قامقورشىلىققا بەرىلگەن.
2020 جىلدىڭ جەلتوقسانىندا دۇنيەگە كەلگەن جانە 2019 جىلدىڭ ماۋسىمىندا تۋعان ەكى ۇل بالا 2023 جىلدىڭ 19 قىركۇيەگىندە شىمكەنت قالالىق ءبىلىم باسقارماسى باسشىسىنىڭ بۇيرىعىمەن قامقورشىلىققا بەرىلگەن.
قالالىق ءبىلىم باسقارماسى بالالاردى قامقورلىققا بەرۋ جانە اسىراپ الۋ پروتسەدۋرالارى ءبىلىم جانە عىلىم ءمينيسترىنىڭ 2020 جىلدىڭ 24 ساۋىردەگى № 158 «وتباسى جانە بالالار سالاسىنداعى مەملەكەتتىك كورسەتىلەتىن قىزمەتتەر كورسەتۋ قاعيدالارىن بەكىتۋ تۋرالى» بۇيرىعىمەن بەلگىلەنگەن تارتىپپەن جۇزەگە اسىرىلعانىن العا تارتتى.
«2021 جىلدىڭ 7 ساۋىرىندە ءبىلىم باسقارماسىنا شىمكەنت قالاسى اباي اۋدانى كوكبۇلاق تۇرعىن الابىندا تۇراتىن ازاماتتان جەتىم جانە اتا-اناسىنىڭ قامقورلىعىنسىز قالعان كامەلەتكە تولماعان بالالاردى قامقورشىلىققا الۋ ءۇشىن كانديدات رەتىندە رەسپۋبليكالىق دەرەكتەر بانكىنە ەسەپكە قويۋ ءۇشىن ءتيىستى قۇجاتتارىمەن ءوتىنىشى كەلىپ ءتۇستى. ۇسىنعان قۇجاتتار باسقارما قىزمەتكەرلەرى تاراپىنان زەردەلەنىپ تەكسەرىلدى. ساراپتاما جۇرگىزىلىپ، وتىنىشتە كورسەتىلگەن مەكەنجاي بويىنشا تۇرعىن ءۇي-تۇرمىستىق جاعدايى تۋرالى اكت جاسالدى. جوعارىدا اتالعان راسىمدەردىڭ وڭ ناتيجەسىنە بايلانىستى ازامات جەتىم جانە اتا-اناسىنىڭ قامقورلىعىنسىز قالعان بالالاردى قورعانشىلىق جانە قامقورشىلىققا الۋ ءۇشىن كانديدات رەتىندە رەسپۋبليكالىق دەرەكتەر بانكىندە تىركەلدى»، - دەدى باسقارماداعىلار.
