قىرعىزستان پارلامەنتىنىڭ دەپۋتاتتارى رەسمي تۇردە «شەتەل اگەنتتەرى» تۋرالى زاڭ جوباسىن قابىلدادى، - دەپ حابارلايدى “ادىرنا” ۇلتتىق پورتالى 24.kg سايتىنا سىلتەمە جاساپ.
قۇجاتقا 66 دەپۋتات داۋىس بەرسە، 5-ءى قارسى بولدى. زاڭ جوباسى قىرعىزستان پرەزيدەنتىنىڭ قول قويۋىنا جىبەرىلدى.
جەرگىلىكتى باق-تىڭ حابارلاۋىنشا، ەگەر زاڭ قابىلدانسا، قىرعىزستانداعى «شەتەل اگەنتتەرى» «شەتەلدىك وكىلدەر» دەپ اتالادى. ولار رەسەيدەگى «شەتەلدىك اگەنتتەر» تىزىمىنە باستاپقىدا ەنگىزىلگەن كريتەريلەر بويىنشا ەنگىزىلەدى: شەتەلدىك قارجىلاندىرۋ جانە ساياسي قىزمەت. ولارعا جوسپارلى (جىلىنا ءبىر رەتتەن ءجيى ەمەس) جانە جوسپاردان تىس تەكسەرۋلەر بەلگىلەنەدى.
سونداي-اق زاڭ جوباسىندا «شەتەل اگەنتتەرىنەن» ءوز قىزمەتى تۋرالى ەگجەي-تەگجەيلى ەسەپتەردى، سونىڭ ىشىندە شەتەلدىك كوزدەردەن الىنعان قاراجاتتىڭ ءاۋديتى مەن ولاردىڭ پايدالانىلۋى، باسشىلىق تۋرالى اقپارات، قىزمەتكەرلەردىڭ سانى جانە ولاردىڭ جالاقىسى تۋرالى اقپاراتتى جۇيەلى تۇردە ۇسىنۋ تالاپ ەتىلەدى. سونىمەن قاتار، ولار جارتى جىلدا ءبىر رەت باق-تا ءوز قىزمەتى تۋرالى ەسەبىن جاريالاۋى ءتيىس.
ازاماتتاردىڭ جەكە باسى مەن قۇقىقتارىنا قول سۇعاتىن، سونداي-اق ازاماتتارعا كۇش كورسەتۋگە نەمەسە ولاردىڭ دەنساۋلىعىنا وزگە دە زيان كەلتىرۋگە، زاڭسىز ارەكەتتەر جاساۋعا يتەرمەلەۋگە اكەپ سوعاتىن كوممەرتسيالىق ەمەس ۇيىمدى قۇرعانى جانە باسقارعانى ءۇشىن 50 مىڭنان 100 مىڭعا دەيىنگى سوم ايىپپۇل سالۋعا نەمەسە بەس جىلعا دەيىنگى مەرزىمگە باس بوستاندىعىنان ايىرۋ جازاسى تاعايىندالادى. مۇنداي بىرلەستىكتەردىڭ قىزمەتىنە بەلسەندى قاتىسقانى جانە ولاردى ناسيحاتتاعانى ءۇشىن 100-دەن 200 مىڭ سومعا دەيىن ايىپپۇل سالۋ نەمەسە 10 جىلعا دەيىن باس بوستاندىعىنان ايىرۋ قاراستىرىلعان.
