بۇگىن قۇرىلتاي وتىرىسىندا عىلىمنىڭ قولدانبالى سالا رەتىندەگى دامۋى جان-جاقتى تالقىلاندى. دەپۋتاتتار جوعارى اۋديتورلىق پالاتا توراعاسىنىڭ عىلىمدى دامىتۋ سالاسىنداعى مەملەكەتتىك اۋديت قورىتىندىلارى تۋرالى ەسەبىن تىڭدادى. ونىڭ قورىتىندىسى بويىنشا ۇكىمەتكە جوعارى اۋديتورلىق پالاتا مەن دەپۋتاتتىق كورپۋستىڭ بىرقاتار ناقتى ۇسىنىمدارى شىعارىلدى.
تالقىلاۋدى قورىتىندىلاي كەلە، قۇرىلتاي توراعاسى ايبەك دادەباي بۇگىنگى تاڭدا عىلىم قوسالقى سالا رەتىندە ەمەس، ەلدىڭ بولاشاعىنا، ەكونوميكالىق ءوسىمى مەن باسەكەگە قابىلەتتىلىگىنە تىكەلەي ىقپال ەتەتىن ستراتەگيالىق رەسۋرس رەتىندە قاراستىرىلاتىنىن ايتتى. سپيكەر اتاپ وتكەندەي، بۇل پرەزيدەنتتىڭ جۋىرداعى قازاقستان حالقىنا جولداۋىندا دا كورىنىس تاپتى، سونداي-اق ناقتى تسيفرلار دا وسىنى ايعاقتاپ وتىر.
– سوڭعى جىلدارى عىلىمدى قارجىلاندىرۋ ەكى ەسەدەن استام ارتتى. عىلىمي زەرتتەۋلەر جانە ازىرلەمەلەرمەن شۇعىلداناتىن ماماندار سانى ۇشتەن بىرگە كوبەيدى. عىلىمي قوعامداستىقتىڭ جارتىسىنا جۋىعىن جاس عالىمدار قۇرايدى. دەگەنمەن، عىلىمنىڭ پراكتيكالىق قايتارىمى، ناتيجەلىلىگى مەن كوممەرتسيالانۋى مەملەكەت ءۇشىن وزەكتى كۇيىندە قالىپ وتىر،– دەدى قۇرىلتاي سپيكەرى.
ول سونداي-اق تالقىلاۋ كەزىندە دەپۋتاتتار بەلگىلەگەن بىرقاتار ماڭىزدى ماسەلەگە توقتالدى. اتاپ ايتقاندا، عىلىمي سالانى باسقارۋ عىلىمي جوبالاردى سۇيەمەلدەۋگە قاتىستى بارلىق پروتسەستى – ۇسىنىمداردى دايىنداۋدان باستاپ تۇپكىلىكتى ناتيجەلەردى ەنگىزۋگە دەيىن تسيفرلاندىرۋدى تالاپ ەتەتىنىن جەتكىزدى. سونىمەن قاتار، عىلىمي-تەحنيكالىق تاپسىرمالاردى تۇجىرىمداۋ ەكونوميكا مەن بيزنەستىڭ ناقتى سۇرانىستارى مەن قاجەتتىلىكتەرىن ەسكەرۋگە تيىستىگىن ايتتى. دەپۋتاتتاردىڭ پىكىرىنشە، وسىعان بايلانىستى، بىرلەسكەن قىزمەتتىڭ ناقتى ناتيجەسىنە باعىتتالعان ىنتالاندىرۋشى تەتىكتەردى جەتىلدىرۋ قاجەت.
قۇرىلتاي سپيكەرى اتاپ وتكەندەي، عىلىمي قىزمەتتىڭ ناتيجەلىلىگىنە جۇرگىزىلگەن مونيتورينگ ونىڭ ادامداردىڭ ءومىر ءسۇرۋ ساپاسىنا تيگىزەتىن اسەرىن باعالاۋعا ءتيىس. عىلىمي ازىرلەمەنىڭ ناقتى ومىرلىك تسيكلىن جانە ونىڭ ەكونوميكاعا تيگىزەتىن ناقتى ىقپالىن قاداعالاپ وتىرۋ ماڭىزعا يە. بۇل قاتاردا، تەحنولوگيالاردى ەنگىزۋ، جاڭا جۇمىس ورىندارىن اشۋ، ونىمدەردى ەكسپورتتاۋ قامتىلادى. ال مونيتورينگتىڭ باستى كريتەريى عىلىمي ازىرلەمەلەردىڭ ازاماتتارىمىزدىڭ ءومىرىن ناقتى قالاي جاقسارتاتىنى بولۋعا ءتيىس.
تالقىلاۋ قورىتىندىسى بويىنشا دەپۋتاتتاردىڭ بارلىق ۇسىنىمدارى ۇكىمەتكە جىبەرىلەتىن بولادى.
