الماتى قالاسىندا فيلوسوفيا، ساياساتتانۋ جانە ءدىنتانۋ ينستيتۋتىنىڭ بازاسىندا «قۇرىلتاي سايلاۋى - ادىلەتتى قازاقستاندى جۇزەگە اسىرۋدىڭ جاڭا كەزەڭى» تاقىرىبىندا ساراپشىلىق وتىرىس ءوتتى. ءىس-شارا بارىسىندا مەگاپوليستىڭ ساراپشىلارى قالا تۇرعىندارىن قۇرىلتاي سايلاۋىنا بەلسەندى قاتىسۋعا شاقىردى.
ءىس-شارا الداعى قۇرىلتاي سايلاۋىنىڭ قوعامدىق-ساياسي ماڭىزىن، ونىڭ ەلدىڭ ساياسي جۇيەسىن ودان ءارى جەتىلدىرۋدەگى، قوعامدىق ديالوگتى نىعايتۋداعى جانە ادىلەتتى قازاقستاندى قۇرۋ باعىتىن ىسكە اسىرۋداعى ءرولىن تالقىلاۋعا ارنالعان پىكىر الماسۋ الاڭىنا اينالدى.
ءىس-شاراعا قاتىسۋشىلارعا فيلوسوفيا، ساياساتتانۋ جانە ءدىنتانۋ ينستيتۋتىنىڭ باس ديرەكتورى ايگۇل سادۋاقاسوۆا قۇتتىقتاۋ ءسوز سويلەدى. ساراپشىلىق وتىرىستى ينستيتۋتتىڭ سالىستىرمالى ساياسي زەرتتەۋلەر ورتالىعىنىڭ جەتەكشىسى ايدار امىرباەۆ جۇرگىزدى.
تالقىلاۋعا «التەرناتيۆا» وزەكتى زەرتتەۋلەر ورتالىعىنىڭ ديرەكتورى اندرەي چەبوتارەۆ، فيلوسوفيا، ساياساتتانۋ جانە ءدىنتانۋ ينستيتۋتىنىڭ باس عىلىمي قىزمەتكەرى اسقار شومانوۆ، «ەۋرازيا الەمى» اقپاراتتىق-تالداۋ جۋرنالىنىڭ پرەزيدەنتى ءارى باس رەداكتورى ەدۋارد پولەتاەۆ، تاۋەلسىز ساياساتتانۋشى اسقار نۇرشا، سونداي-اق ساراپشىلىق جانە عىلىمي قاۋىمداستىق وكىلدەرى قاتىستى.
وتىرىس بارىسىندا قۇرىلتاي ينستيتۋتىن ودان ءارى دامىتۋ، مەملەكەت پەن قوعامنىڭ ءوزارا ءىس-قيمىل تەتىكتەرىن جەتىلدىرۋ، سونداي-اق قازاقستان رەسپۋبليكاسىنىڭ قوعامدىق-ساياسي دامۋىنىڭ وزەكتى ۇردىستەرى تالقىلاندى.
قاتىسۋشىلار داۋىس بەرۋ ۇدەرىسىندەگى ازاماتتاردىڭ ەلەكتورالدىق بەلسەندىلىگى ماسەلەسىنە ەرەكشە نازار اۋداردى. بەلسەندى ازاماتتىق ۇستانىم مەن سايلاۋ قۇقىعىن جۇزەگە اسىرۋ اشىق ءارى ادىلەتتى قوعام قالىپتاستىرۋعا قوسىلاتىن ماڭىزدى ۇلەس ەكەنى اتاپ ءوتىلدى.
ساراپشىلار مەملەكەتتىك ماڭىزى بار شەشىمدەردى قابىلداۋ ۇدەرىسىندە قوعامدىق قاتىسۋدىڭ ماڭىزدى ءرولىن تالقىلادى.
سپيكەرلەر ءوز سوزدەرىندە ەلىمىزدە جۇرگىزىلىپ جاتقان ساياسي رەفورمالار اشىقتىق، ەسەپ بەرۋشىلىك جانە مەملەكەت پەن ازاماتتىق قوعام اراسىنداعى سىندارلى ءوزارا ءىس-قيمىل قاعيداتتارىن نىعايتۋعا باعىتتالعانىن اتاپ ءوتتى. سونىمەن قاتار، قۇرىلتاي سايلاۋى قوعامدىق وكىلدىك جۇيەسىن ينستيتۋتسيونالدىق تۇرعىدان ودان ءارى دامىتۋداعى ماڭىزدى كەزەڭ ەكەنى، ازاماتتاردىڭ قوعامدىق-ساياسي ۇدەرىستەرگە قاتىسۋ مۇمكىندىگىن كەڭەيتىپ، جالپىۇلتتىق ديالوگتى نىعايتۋعا ىقپال ەتەتىنى ايتىلدى.
وتىرىس قورىتىندىسى بويىنشا قاتىسۋشىلار قوعامدىق قاتىسۋ ينستيتۋتتارىن دامىتۋعا، قوعامدىق كەلىسىمدى نىعايتۋعا جانە «ادىلەتتى قازاقستان» تۇجىرىمداماسىن دايەكتى ىسكە اسىرۋعا باعىتتالعان ساياسي رەفورمالاردى ودان ءارى ساراپشىلىق تۇرعىدان سۇيەمەلدەۋدىڭ ماڭىزدىلىعىن راستادى.
