بۇگىن، 16 قىركۇيەكتە ءبىرىنشى شاقىرىلىمداعى قۇرىلتاي جانىنان قوعامدىق پالاتا قۇرۋ تۋرالى شەشىم قابىلداندى، دەپ حابارلايدى «ادىرنا» ءتىلشىسى.
قوعامدىق پالاتا دەپۋتاتتاردىڭ ساراپشىلارمەن، عالىمدارمەن، ازاماتتىق قوعام وكىلدەرىمەن، كاسىبي بىرلەستىكتەرمەن جانە وڭىرلەرمەن تىكەلەي ءوزارا ءىس-قيمىل جاسايتىن تۇراقتى الاڭىنا اينالماق. مالىمەتكە سايكەس، ونىڭ قۇرامىنا 50 ادام ەنگىزىلەدى دەپ جوسپارلانىپ وتىر.
سونداي-اق پالاتانىڭ نەگىزگى مىندەتتەرىنىڭ ءبىرى زاڭ جوبالارىنا «نولدىك وقىلىم» كەزەڭىندە قوعامدىق جانە ساراپتامالىق باعا بەرۋ بولاتىنى اتاپ ءوتىلدى.
بۇل ەڭ ماڭىزدى زاڭنامالىق باستامالار بويىنشا بالاما ۇستانىمداردى، كاسىبي باعالاۋلاردى، ىقتيمال ەسكەرتۋلەر مەن ۇسىنىستاردى الدىن الا ەسكەرۋگە مۇمكىندىك بەرمەك. بۇدان بولەك، قوعامدىق پالاتا ەلدىڭ قوعامدىق-ساياسي جانە الەۋمەتتىك-ەكونوميكالىق دامۋىنىڭ وزەكتى ماسەلەلەرىن تالقىلايدى.
جاقىن ۋاقىتتا قۇرىلتاي بيۋروسى قوعامدىق پالاتا تۋرالى ەرەجەنى بەكىتىپ، ونىڭ قۇرامىن ايقىنداپ، باسشىلىق لاۋازىمدارعا تاعايىندالاتىن تۇلعالاردى انىقتاۋى ءتيىس.
