Bügın Qūryltai otyrysynda ǧylymnyŋ qoldanbaly sala retındegı damuy jan-jaqty talqylandy. Deputattar Joǧary auditorlyq palata Töraǧasynyŋ Ǧylymdy damytu salasyndaǧy memlekettık audit qorytyndylary turaly esebın tyŋdady. Onyŋ qorytyndysy boiynşa Ükımetke Joǧary auditorlyq palata men deputattyq korpustyŋ bırqatar naqty ūsynymdary şyǧaryldy.
Talqylaudy qorytyndylai kele, Qūryltai Töraǧasy Aibek Dädebai bügıngı taŋda ǧylym qosalqy sala retınde emes, eldıŋ bolaşaǧyna, ekonomikalyq ösımı men bäsekege qabılettılıgıne tıkelei yqpal etetın strategiialyq resurs retınde qarastyrylatynyn aitty. Spiker atap ötkendei, būl Prezidenttıŋ juyrdaǧy Qazaqstan halqyna Joldauynda da körınıs tapty, sondai-aq naqty sifrlar da osyny aiǧaqtap otyr.
– Soŋǧy jyldary ǧylymdy qarjylandyru ekı eseden astam artty. Ǧylymi zertteuler jäne äzırlemelermen şūǧyldanatyn mamandar sany üşten bırge köbeidı. Ǧylymi qoǧamdastyqtyŋ jartysyna juyǧyn jas ǧalymdar qūraidy. Degenmen, ǧylymnyŋ praktikalyq qaitarymy, nätijelılıgı men kommersiialanuy memleket üşın özektı küiınde qalyp otyr,– dedı Qūryltai Spikerı.
Ol sondai-aq talqylau kezınde deputattar belgılegen bırqatar maŋyzdy mäselege toqtaldy. Atap aitqanda, ǧylymi salany basqaru ǧylymi jobalardy süiemeldeuge qatysty barlyq prosestı – ūsynymdardy daiyndaudan bastap tüpkılıktı nätijelerdı engızuge deiın sifrlandyrudy talap etetının jetkızdı. Sonymen qatar, ǧylymi-tehnikalyq tapsyrmalardy tūjyrymdau ekonomika men biznestıŋ naqty sūranystary men qajettılıkterın eskeruge tiıstıgın aitty. Deputattardyŋ pıkırınşe, osyǧan bailanysty, bırlesken qyzmettıŋ naqty nätijesıne baǧyttalǧan yntalandyruşy tetıkterdı jetıldıru qajet.
Qūryltai Spikerı atap ötkendei, ǧylymi qyzmettıŋ nätijelılıgıne jürgızılgen monitoring onyŋ adamdardyŋ ömır süru sapasyna tigızetın äserın baǧalauǧa tiıs. Ǧylymi äzırlemenıŋ naqty ömırlık siklın jäne onyŋ ekonomikaǧa tigızetın naqty yqpalyn qadaǧalap otyru maŋyzǧa ie. Būl qatarda, tehnologiialardy engızu, jaŋa jūmys oryndaryn aşu, önımderdı eksporttau qamtylady. Al monitoringtıŋ basty kriteriiı ǧylymi äzırlemelerdıŋ azamattarymyzdyŋ ömırın naqty qalai jaqsartatyny boluǧa tiıs.
Talqylau qorytyndysy boiynşa deputattardyŋ barlyq ūsynymdary Ükımetke jıberıletın bolady.
