Abu-Dabide Ukraina, Resei jäne AQŞ arasyndaǧy kelıssözder aiaqtaldy. Būl turaly 11 qaraşada TASS jazdy, dep habarlaidy «Adyrna» tılşısı.
Kelıssözderdıŋ aiaqtalǧanyn AFP agenttıgı Ukraina delegasiiasyndaǧy derekközge, al Reuters aty-jönı atalmaǧan derekközge sılteme jasap rastady.
TASS-tyŋ jazuynşa, Kiev pen Mäskeu äskeri tūtqyndardy auqymdy türde almasuǧa kelısken. Kezdesu 2 saǧatqa jepei aiaqtalüan. Al AFP mälımetınşe, AQŞ-tyŋ araǧaiyndyǧymen ötıp jatqan kelıssözder barysynda Ukraina Reseiden äskeri qimyldardy toqtatudy talap etken. Ukraina delegasiiasyndaǧy derekközdıŋ aituynşa, tek osydan keiın ǧana Europadaǧy bolaşaq qauıpsızdık jüiesın talqylauǧa bolady.
Bügın Abu-Dabide AQŞ-tyŋ araǧaiyndyǧymen Resei men Ukraina arasyndaǧy kelıssözderdıŋ ekınşı künı bastalǧan edı. Kezdesu Reseidıŋ Ukrainaǧa qarsy soǧysyn aiaqtau jönınde uaǧdalastyqqa qol jetkızuge baǧyttalǧan.
«Aldymen AQŞ pen Reseidıŋ qatysuymen üşjaqty formatta kezdesu ötkızemız. Odan keiın Europadaǧy serıktesterımızben jeke kezdesemız», – dedı Ukraina delegasiiasynyŋ basşysy, Ukrainanyŋ Syrtqy barlau qyzmetınıŋ jetekşısı Rüstem Umerov.
Abu-Dabidegı kelıssözderdıŋ qaita jalǧasqany turaly Resei BAQ-tary da habarlady. Üşjaqty kezdesudıŋ ekınşı künınde energetika mäselelerı, Qara teŋızdegı qauıpsızdık jäne joǧary deŋgeidegı yqtimal kezdesu talqylanatyny aitylǧan.
Al AFP agenttıgı Ukrainanyŋ joǧary lauazymdy ökılıne sılteme jasap, Kiev soǧys aiaqtalǧannan keiın kemınde 10 jyl boiy 800 myŋ äskeri qyzmetkerden tūratyn armiiany ūstauǧa qarjy böludı közdep otyrǧanyn jazdy. Ukraina mūny Resei tarapynan boluy mümkın jaŋa äskeri agressiiadan qorǧanu üşın qajet dep sanaidy.
Bırıkken Arab Ämırlıkterınıŋ astanasynda ötken kelıssözderdıŋ alǧaşqy künınde Kiev pen Mäskeu ökılderı qauıpsızdık kepıldıkterı men äskeri tūtqyndardy «1000-ǧa 1000» nemese «1500-ge 1500» formulasy boiynşa almasu mäselelerın talqylaǧan.
Kelıssözderde aumaqtyq mäsele de köterılgen. Zelenskiidıŋ aituynşa, būl taqyrypty Resei delegasiiasy qozǧaǧan.
«Reseilıkter Donbass aumaǧynyŋ jartysyn basyp aldyq dep esepteidı jäne sony alǧa tartady. Alaida ol aumaq, şyn mänınde, bızdıŋ baqylauymyzda. Būl turaly reseilık delegasiia qūramyndaǧy äskeri ofiserler men barlau ökılderı baiyppen aitty», – dedı ol.
Sondai-aq Zelenskii maidandaǧy jaǧdaiǧa qatysty Ukrainanyŋ baǧasyn amerikalyq tarap ta rastaǧanyn atap öttı.
Financial Times basylymynyŋ mälımetınşe, Europa şeneunıkterı qyrǧi-qabaq soǧys kezeŋınde qoldanylǧan qaqtyǧystardyŋ aldyn alu tetıkterın qaita qalpyna keltıru mäselesın talqylauǧa daiyn. Olardyŋ qatarynda AQŞ pen KSRO-ǧa bır-bırınıŋ äskeri nysandaryn baqylauǧa mümkındık bergen Aşyq aspan turaly şart jäne zymyrandardyŋ jekelegen türlerın ornalastyrudy şekteitın kelısımder bar.
Al Axios basylymynyŋ habarlauynşa, Abu-Dabidegı kelıssözderden keiın Aq üidıŋ arnaiy ökılderı Stiv Uitkoff pen Djared Kuşner Mäskeu men Kievke baruy mümkın.
