پرەزيدەنت قاسىم-جومارت توقاەۆ «حالىقتىق قۇرىلىس» باستاماسىنىڭ ماڭىزىنا توقتالىپ، ونىڭ تۇتاس قوعامنىڭ ءال-اۋقاتىن ارتتىرۋعا باعىتتالعانىن اتاپ ءوتتى، دەپ حابارلايدى "ادىرنا" ۇلتتىق پورتالى.
بۇل تۋرالى مەملەكەت باسشىسى قازاقستان حالقىنا ارناعان جولداۋىندا مالىمدەدى.
پرەزيدەنتتىڭ ايتۋىنشا، «حالىقتىق قۇرىلىس» ەلىمىزدەگى ەڭ ءىرى ينفراقۇرىلىمدىق جوبالاردىڭ بىرىنە اينالماق. باستاما ازاماتتاردىڭ تۇرمىس ساپاسىن جاقسارتۋعا، كاسىپكەرلىكتى دامىتۋعا جانە ۇلتتىق ەكونوميكانى جانداندىرۋعا ىقپال ەتۋى ءتيىس.
«بىراق ەڭ ماڭىزدى ماسەلە – ءبىز كەلەشەك ۇرپاقتارعا تۇجىرىمدامالار مەن جوسپارلار، شەتەلدەگى قۇندى قاعازداردا ساقتالعان، ۋاقىت وتكەن سايىن ارزانداپ بارا جاتقان قارجىنى ەمەس، حالىققا قىزمەت ەتەتىن ناقتى الەۋمەتتىك نىسانداردى امانات رەتىندە قالدىرۋىمىز كەرەك.
قۇرىلىسپەن اينالىسۋ – جاسامپازدىققا، جاڭاشىلدىققا ۇمتىلۋ. سوندىقتان «قۇرىلىس جانە تاعى دا قۇرىلىس» دەگەن ءبىر اۋىز ءسوز جاڭعىرۋ جولىنا تۇسكەن قازاقستاننىڭ مىزعىماس قاعيداتى، جالپىۇلتتىق ۇرانى بولۋعا ءتيىس.
«حالىقتىق قۇرىلىس» جۇرتىمىزدى ءبىر ماقسات پەن مۇددەگە بىرىكتىرەدى، ەلىمىزدى ناعىز ورلەۋ مەن وركەندەۋ جولىنا باستايدى.
وسىعان وراي، الداعى ءۇش جىلدىڭ ىشىندە ۇلتتىق قوردان 6,5 تريلليون تەڭگە بولىنەدى", - دەدى پرەزيدەنت.
مەملەكەت باسشىسى جوبانىڭ ءجۇز مىڭداعان ادامدى جۇمىسپەن قامتۋعا مۇمكىندىك بەرەتىنىن اتاپ ءوتتى. ونىڭ يگىلىگىن بۇكىل حالىق، اسىرەسە وسكەلەڭ ۇرپاق كورەدى دەپ جوسپارلانىپ وتىر.
سونداي-اق پرەزيدەنت كەلەسى جىلدى جالپىحالىقتىق اۋقىمدى قۇرىلىس جىلى دەپ جاريالاۋدى ۇسىندى. باستاما اياسىندا ەلىمىزدىڭ بارلىق وڭىرىندە الەۋمەتتىك، كولىك جانە ينجەنەرلىك ينفراقۇرىلىم نىساندارىن سالۋ جانە جاڭارتۋ كوزدەلگەن.
اتاپ ايتقاندا، جولدار، اۋەجايلار، ۆوكزالدار، مەديتسينالىق مەكەمەلەر، ەرەكشە قاجەتتىلىگى بار بالالارعا ارنالعان وڭالتۋ ورتالىقتارى، شىعارماشىلىق ۇيلەرى، سپورت كەشەندەرى، كىتاپحانالار مەن عىلىمي ورتالىقتار بوي كوتەرمەك.
