كاسىپكەرلەرگە زاڭسىز كەدەرگى كەلتىرۋ ەل ەكونوميكاسىنا زيان تيگىزەدى. بۇل تۋرالى پرەزيدەنت قاسىم-جومارت توقاەۆ ءوز جولداۋىندا ايتتى، دەپ حابارلايدى «ادىرنا» ءتىلشىسى.
مەملەكەت باسشىسى ەكونوميكالىق قۇقىق بۇزۋشىلىقتاردى ودان ءارى قىلمىسسىزداندىرۋ شارالارىن قابىلداۋ قاجەتتىگىن جەتكىزدى. ونىڭ ايتۋىنشا، ەكونوميكالىق باپتار بويىنشا قىلمىستىق قۋدالاۋعا ۇشىراعان كاسىپكەرلەردەن ءالى دە وتىنىشتەر ءتۇسىپ جاتىر.
«كاسىپكەرلەرگە، اسىرەسە، شاعىن جانە ورتا بيزنەسكە تەڭ مۇمكىندىك بەرىپ، ءادىل باسەكەگە جول اشۋ قاجەت. كەي جاعدايدا وسى تالاپ ساقتالمايدى. وعان دالەل: قازىردىڭ وزىندە وندىرۋشىلەر، اسىرەسە ازىق-تۇلىك سالاسىنداعى كاسىپورىندار بىرقاتار قيىندىققا تاپ بولۋدا. ءتىپتى، ادەيى جاسالعان كەدەرگىلەر دە بار»،–دەدى قاسىم-جومارت توقاەۆ.
پرەزيدەنتتىڭ سوزىنشە، يمپورتتىق تاۋارلاردىڭ قۇنى قولدان تومەندەتىلىپ وتىر. ال وتاندىق ونىمدەردىڭ ىشكى نارىققا شىعۋ جولى ادەيى شەكتەلىپ جاتادى.
«شىنىن ايتقاندا، بۇل – جەمقورلىق. سوندىقتان وسىنداي قيتۇرقى ارەكەتتەردى توقتاتۋ كەرەك. مۇنداي احۋال ەلىمىزدىڭ كومپانيالارى مەن تاۋارلارىنىڭ باسەكەگە قابىلەتىن ەداۋىر السىرەتىپ جىبەرەتىنى ءسوزسىز. وسىنداي ءىس-قيمىلدارعا قاتاڭ توسقاۋىل قويماساق، ەكونوميكامىزعا زيان بولاتىنى ايدان انىق. باسقاشا ايتساق، بيزنەستى قورعاۋ – ۇلتتىق ەكونوميكانىڭ دەربەستىگىن نىعايتۋ دەگەن ءسوز. ال بيزنەسكە قولدان زاڭسىز توسقاۋىل جاساۋ، بۇل – مەملەكەتكە قارسى جاسالعان قىلمىس دەپ ايتساق ارتىق بولماس. سوندىقتان كاسىپكەرلەردى قولداۋ تەتىكتەرىن جەتىلدىرۋ، ياعني نىعايتۋ قاجەت. بۇل جۇمىستى ساۋدا بىرلەستىكتەرى اياسىندا جۇرگىزۋگە دە بولادى»،– دەدى ول.
