تۇركيا مەن ازەربايجاننىڭ اراسىنا ىرىتكى سالۋعا باعىتتالعان ارەكەتتەر ساتسىزدىككە ۇشىرايدى. بۇل تۋرالى تۇركيا پرەزيدەنتى رەجەپ تايپ ەردوعان ازەربايجاننان قايتىپ بارا جاتىپ، ۇشاق بورتىندا جۋرناليستەرگە بەرگەن سۇحباتىندا مالىمدەدى، دەپ حابارلايدى «ادىرنا» ءتىلشىسى.
تۇركيا باسشىسى ەكى ەل اراسىنداعى بىرلىك كەيبىر توپتىڭ الاڭداۋشىلىعىن تۋعىزىپ وتىرعانىن اتاپ ءوتتى.
«تاريحقا كوز جۇگىرتسەك، تۇركيا، ازەربايجان جانە باسقا دا تۇركى مەملەكەتتەرى بىرلەسىپ ارەكەت ەتكەندە قانداي مۇمكىندىكتەرگە يە بولاتىنىن تۇسىنۋگە بولادى. ءبىز – ينستيتۋتسيونالدىق قۇرىلىمى ءارتۇرلى مەملەكەتتەرمىز. الايدا ارامىزدى بەرىك باۋىرلاستىق بايلانىس بىرىكتىرەدى. ءبىزدىڭ كۇش-قۋاتىمىز دا وسى بىرلىكتە. باۋىرلاستىعىمىز – ورتاق تاريحىمىزدىڭ، مادەني مۇرامىزدىڭ جانە كەلەر ۇرپاققا امانات ەتەتىن اسىل قۇندىلىقتارىمىزدىڭ ەڭ سەنىمدى كەپىلدەرىنىڭ ءبىرى»، – دەپ اتاپ ءوتتى رەجەپ تايپ ەردوعان.
سونداي-اق ول ەكى ەل تاعدىرىنىڭ ورتاقتىعىنا، ىنتىماقتاستىعى مەن باۋىرلاستىق بايلانىسىنىڭ مىزعىماستىعىنا نازار اۋداردى.
«تۇركيا مەن ازەربايجان وڭىردەگى بەيبىتشىلىك، تۇراقتىلىق پەن وركەندەۋدى قامتاماسىز ەتۋ جولىندا الداعى ۋاقىتتا دا ءاردايىم بىرگە بولادى»، – دەدى پرەزيدەنت.
ەسكك سالايىق، ازەربايجان باسشىسى يلحام اليەۆ 29-30 قازاندا انكارادا وتكەن تۇركى مەملەكەتتەرى ۇيىمىنىڭ 13-سامميتىنە قاتىسپاعان ەدى. بۇعان پرەزيدەنتتىڭ جۇمىس كەستەسىنىڭ تىعىزدىعى سەبەپ بولعانى ايتىلعان.
