الماتى قالاسىنداعى رەسپۋبليكالىق فيزيكا-ماتەماتيكا مەكتەبى (رفمم) فيليالىنىڭ ديرەكتورى قىزمەتىنەن كەتتى. قازان ايىندا مەكتەپتىڭ 58 وقۋشىسى جەدەل ىشەك ينفەكتسياسىنىڭ بەلگىلەرىمەن اۋرۋحاناعا جاتقىزىلعان بولاتىن، دەپ حابارلايدى «ادىرنا» ءتىلشىسى.
مەكتەپتىڭ ءباسپاسوز قىزمەتى ديرەكتوردىڭ ءوز ەركىمەن قىزمەتىنەن كەتكەنىن مالىمدەگەن.
ەندى بۇل مىندەتتى الماز كۇنعوجين اتقارادى. ول – ماتەماتيكا ماماندىعى بويىنشا PhD دوكتورى، سونداي-اق رفمم تۇلەگى. كۇنعوجين بۇعان دەيىن 2018–2023 جىلدارى مەكتەپتىڭ الماتىداعى فيليالىن باسقارعان.
ەسكە سالايىق، 14 قازاندا الماتىداعى رفمم-ءنىڭ 50-گە جۋىق وقۋشىسى جەدەل ىشەك ينفەكتسياسىنىڭ بەلگىلەرىمەن اۋرۋحاناعا جاتقىزىلعانى بەلگىلى بولعان. وقيعادان كەيىن مەكتەپ ۋاقىتشا ونلاين وقىتۋ فورماتىنا كوشكەن. ينتەرنات پەن اس بلوگىنىڭ جۇمىسى توقتاتىلىپ، سانيتاريالىق-ەپيدەميولوگيالىق قىزمەت ماماندارى عيماراتتاردى تەكسەرىپ، زەرتحانالىق زەرتتەۋلەر جۇرگىزۋ ءۇشىن سىنامالار العان. سونداي-اق الماتى پوليتسياسىنىڭ رفمم وقۋشىلارىنىڭ جاپپاي ۋلانۋ دەرەگى بويىنشا قىلمىستىق ءىس قوزعاعانى بەلگىلى بولدى.
