فوتو: Getty images
قازاقستاننىڭ ءبىرىنشى راكەتكاسى ەلەنا رىباكينا دەنساۋلىعىنا بايلانىستى ينديان-ۋەللستە ءوتىپ جاتقان WTA قورىتىندى تۋرنيرىندەگى ونەرىن جالعاستىرمايتىن بولدى. وسىلايشا، قازاقستاندىق تەننيسشى وتكەن جىلعى چەمپيوندىق اتاعىن بيىل قورعاي المايدى، دەپ حابارلايدى "ادىرنا".
سپورتشى الەۋمەتتىك جەلىدەگى پاراقشاسىندا جانكۇيەرلەرىنە مالىمدەمە جاساپ، جارىستان باس تارتۋ تۋرالى شەشىمىن ءتۇسىندىردى. ونىڭ ايتۋىنشا، بيىلعى ماۋسىمدى جوعارى دەڭگەيدە وتكىزگەنىمەن، قازىرگى فيزيكالىق جاعدايى تۋرنيرگە قاتىسۋعا مۇمكىندىك بەرمەيدى.
«جانكۇيەرلەرىمە جانە مەنى قولداپ جۇرگەن جاندارعا جاعىمسىز جاڭالىقتى جەتكىزۋگە ءماجبۇر بولعانىما قاتتى وكىنەمىن. وكىنىشكە قاراي، بيىلعى WTA قورىتىندى تۋرنيرىنەن باس تارتۋىما تۋرا كەلدى. ماۋسىم مەن ءۇشىن ءساتتى ءوتتى، الايدا قازىر اعزام جارىسقا قاتىسۋعا فيزيكالىق تۇرعىدان دايىن ەمەس.
الداعى ۋاقىتتا ۇيدە دەمالىپ، كۇش جيناپ، 2027 جىلعى ماۋسىمعا دايىندالامىن. بۇل تۋرنير مەن ءۇشىن ەرەكشە ورىن الادى. بارلىق قاتىسۋشىعا ساتتىلىك تىلەيمىن. ناۋرىز ايىندا ينديان-ۋەللسكە قايتا ورالۋدى اسىعا كۇتەمىن»، – دەدى تەننيسشى.
رىباكينانىڭ ورنىنا جارىسقا ۋكراينالىق مارتا كوستيۋك قاتىسادى. ول ءتۋرنيردىڭ ءبىرىنشى توبىندا ونەر كورسەتىپ، 8 قاراشادا چەحيالىق ليندا نوسكوۆامەن كەزدەسەدى. ودان كەيىن امەريكالىق تەننيسشىلەر كوري گاۋفف پەن دجەسسيكا پەگۋلاعا قارسى كورتقا شىعادى.
ايتا كەتەيىك، ەلەنا رىباكينا وتكەن جىلى ەر-ريادتا وتكەن WTA قورىتىندى تۋرنيرىندە قارسىلاستارىنا بىردە-ءبىر رەت ەسە جىبەرمەي، چەمپيون اتانعان بولاتىن. بيىلعى جارىستان باس تارتۋىنا بايلانىستى ول تيتۋلىن قورعاي المايدى.
قازاقستاندىق تەننيسشى 2026 جىلعى ماۋسىمدى 54 جەڭىس جانە 14 جەڭىلىس كورسەتكىشىمەن اياقتادى. سونداي-اق جىل ىشىندە ءتورت ءىرى تۋرنيردە چەمپيوندىق اتاققا قول جەتكىزگەن. ولاردىڭ قاتارىندا Australian Open, شتۋتگارت پەن نينبوداعى جارىستار جانە US Open بار.
