ەر-ريادتا (ساۋد ارابياسى) وتكەن ايەلدەر تەننيسىنىڭ ماۋسىمدىق قورىتىندى جارىسى – WTA Finals 2025 اياقتالدى. فينالدىق كەزدەسۋدە قازاقستاندىق تەننيسشى ەلەنا رىباكينا الەمنىڭ ءبىرىنشى راكەتكاسى، "ۇلكەن دۋلىعا" تۋرنيرلەرىنىڭ ءتورت دۇركىن چەمپيونى ارينا سوبولەنكونى (بەلارۋس) 6:3, 7:6 (7:0) ەسەبىمەن جەڭىپ، ءوز مانسابىنداعى ەڭ ءىرى جەتىستىكتەرىنىڭ بىرىنە قول جەتكىزدى، دەپ حابارلايدى "ادىرنا".
بۇل جەڭىس رىباكيناعا 1 500 رەيتينگتىك ۇپاي مەن 5,235 ميلليون اقش دوللارى كولەمىندەگى رەكوردتىق جۇلدە اكەلدى. وسى ناتيجەدەن كەيىن ول 2025 جىلعى 10 قاراشادا جاريالاناتىن جاڭارتىلعان الەمدىك رەيتينگتە بەسىنشى ورىنعا كوتەرىلەدى.
1972 جىلى العاش ۇيىمداستىرىلعان تۋرنير تاريحىندا ەلەنا رىباكينا WTA ماۋسىمدىق قورىتىندى جارىسىندا جەڭىسكە جەتكەن ازيا ەلىنەن شىققان تۇڭعىش تەننيسشى اتاندى. بۇعان دەيىن قىتايلىق لي نا (2013) مەن چجەن تسينۆەن (2024) فينالعا دەيىن عانا جەتكەن بولاتىن.
2025 جىلى رىباكينا 500-دەن استام ەيس سوققان العاشقى تەننيسشى اتاندى. بۇعان دەيىن مۇنداي كورسەتكىشكە 2016 جىلى كارولينا پليشكوۆا عانا جەتكەن ەدى.
ول بيىلعى ماۋسىمدا الەمنىڭ توپ-10 ويىنشىلارىنا قارسى جەتى ماتچ قاتارىنان جەڭىسپەن اياقتاعان جالعىز سپورتشى بولدى.
قازىرگى ۋاقىتتا ەلەنا رىباكينا ءوز كاسىبي مانسابىندا 11 WTA تيتۋلىنا (ونىڭ ىشىندە ەكى WTA 1000 جانە ءبىر "ۇلكەن دۋلىعا" – ۋيمبلدون-2022) يە. بۇل – جەكەلەي سىندا وسىنداي جەتىستىككە جەتكەن العاشقى قازاقستاندىق تەننيسشى.
پرەزيدەنتتىڭ قۇتتىقتاۋى
قازاقستان پرەزيدەنتى قاسىم-جومارت توقاەۆ ەلەنا رىباكينانى تاريحي جەڭىسىمەن قۇتتىقتاپ، ونىڭ سپورتتاعى تابىسى مەن ەل ءيميدجىن كوتەرۋگە قوسقان ۇلەسىن جوعارى باعالادى. مەملەكەت باسشىسى تەننيسشىنى ءىىى دارەجەلى "بارىس" وردەنىمەن ماراپاتتاۋ تۋرالى جارلىققا قول قويدى.
ء«دۇبىرلى دوداداعى جەڭىسىڭىزدى، تەننيستىڭ دامۋىنا قوسقان ۇلەسىڭىزدى جانە اتالعان سپورتتى ەلىمىزدە ناسيحاتتاۋعا سىڭىرگەن ەڭبەگىڭىزدى ەسكەرە وتىرىپ، ءسىزدى ءىىى دارەجەلى "بارىس" وردەنىمەن ماراپاتتاۋ تۋرالى جارلىققا قول قويدىم»، – دەدى پرەزيدەنت ءوز قۇتتىقتاۋىندا.
ەلەنا رىباكينانىڭ بۇل جەڭىسى – قازاقستاندىق تەننيستىڭ جاڭا بەلەسى مەن ەل سپورتىنىڭ الەمدىك ارەناداعى بەدەلىن ارتتىرعان ايتۋلى وقيعا بولدى.
