ماڭعىستاۋ وبلىسىنداعى اسكەري وقۋ-جاتتىعۋلاردى جوسپارلاۋ مەن وتكىزۋ كەزىندە بىرقاتار جۇيەلى كەمشىلىكتەر بولعان، دەپ حابارلايدى “ادىرنا” ۇلتتىق پورتالى.
بۇل تۋرالى پرەمەر-مينيستر ولجاس بەكتەنوۆ دەپۋتاتتىق ساۋالعا بەرگەن جاۋابىندا ايتتى.
ۇكىمەت باسشىسىنىڭ ايتۋىنشا، قورعانىس مينيسترلىگى جۇرگىزگەن كەشەندى تەكسەرۋ بارىسىندا وقۋ-جاتتىعۋلاردى باقىلاۋ، ىقتيمال قاۋىپ-قاتەرلەردى باعالاۋ جانە جاعداي وزگەرگەن كەزدە جەدەل ارەكەت ەتۋ باعىتتارىندا كەمشىلىكتەر انىقتالعان.
اتاپ ايتقاندا، قاۋىپتى فاكتورلارعا جەتكىلىكتى نازار اۋدارىلماعان. سونداي-اق قاۋىپسىزدىك تالاپتارىنىڭ ورىندالۋىن باقىلاۋ جانە وقۋ-جاتتىعۋدىڭ قاۋىپتى كەزەڭدەرىن ۋاقىتىلى توقتاتۋ جونىندەگى شەشىمدەردى قابىلداۋ ماسەلەلەرىندە ولقىلىقتار بولعان.
سونىمەن قاتار قازاقستان قارۋلى كۇشتەرىندە اسكەري قىزمەتشىلەردىڭ قاۋىپسىزدىگىن قامتاماسىز ەتۋ ءۇشىن ۇشقىشسىز ۇشۋ اپپاراتتارى قولدانىلىپ جاتقانى ايتىلدى. ال جەكەلەگەن كۇشتىك قۇرىلىمداردا اسكەري قىزمەتشىلەردىڭ ورنالاسقان جەرى مەن فيزيولوگيالىق جاعدايىن باقىلاۋعا مۇمكىندىك بەرەتىن ارنايى قۇرىلعىلار پايدالانىلۋدا.
بۇدان بولەك، مەملەكەتتىك كۇشتىك ورگاندار «قازگيدرومەتپەن» ءوزارا ءىس-قيمىلدى جولعا قويعان. وسى ارقىلى ولار اۋا رايىنىڭ وزگەرۋى مەن داۋىلدى ەسكەرتۋلەر تۋرالى اقپاراتتى تۇراقتى تۇردە الىپ وتىرادى.
ولجاس بەكتەنوۆتىڭ مالىمەتىنشە، مەملەكەت باسشىسىنىڭ تاپسىرماسىنا سايكەس ۋاكىلەتتى ورگاندار اسكەري رەفورما جوسپارىنىڭ جوباسىن ازىرلەگەن. قۇجاتتا اسكەري باسقارۋ جۇيەسىن جەتىلدىرۋ جانە وقۋ-جاتتىعۋلاردى جوسپارلاۋ ءتارتىبىن بىرىزدەندىرۋ كوزدەلگەن.
پرەمەر-مينيستر اسكەري قىزمەتشىلەردىڭ قاۋىپسىزدىك تالاپتارىن مۇلتىكسىز ورىنداۋى باستى مىندەتتەردىڭ ءبىرى بولىپ قالا بەرەتىنىن اتاپ ءوتتى.
ايتا كەتەيىك، 2026 جىلدىڭ 24 قىركۇيەگىندە ماڭعىستاۋ وبلىسىندا وتكەن اسكەري-تەڭىز وقۋ-جاتتىعۋى كەزىندە كاسپي تەڭىزىندە 17 اسكەري قىزمەتشى داۋىلعا تاپ بولعان. ولار جاعالاۋدا وقۋ-جاۋىنگەرلىك تاپسىرمالارىن ورىنداپ جاتقان ساتتە اۋا رايى كۇرت وزگەرىپ، جەل كۇشەيگەن. وقيعا سالدارىنان ءۇش ادام قۇتقارىلىپ، 14 اسكەري قىزمەتشى سۋعا كەتىپ، قازا تاپتى.
تراگەديادان كەيىن قورعانىس مينيسترلىگىندە كادرلىق وزگەرىستەر بولىپ، مينيستر مەن ونىڭ ورىنباسارلارى اۋىستىرىلدى.
