Maŋǧystau oblysyndaǧy äskeri oqu-jattyǧulardy josparlau men ötkızu kezınde bırqatar jüielı kemşılıkter bolǧan, dep habarlaidy “Adyrna” ūlttyq portaly.
Būl turaly premer-ministr Oljas Bektenov deputattyq saualǧa bergen jauabynda aitty.
Ükımet basşysynyŋ aituynşa, qorǧanys ministrlıgı jürgızgen keşendı tekseru barysynda oqu-jattyǧulardy baqylau, yqtimal qauıp-qaterlerdı baǧalau jäne jaǧdai özgergen kezde jedel äreket etu baǧyttarynda kemşılıkter anyqtalǧan.
Atap aitqanda, qauıptı faktorlarǧa jetkılıktı nazar audarylmaǧan. Sondai-aq qauıpsızdık talaptarynyŋ oryndaluyn baqylau jäne oqu-jattyǧudyŋ qauıptı kezeŋderın uaqytyly toqtatu jönındegı şeşımderdı qabyldau mäselelerınde olqylyqtar bolǧan.
Sonymen qatar Qazaqstan qaruly küşterınde äskeri qyzmetşılerdıŋ qauıpsızdıgın qamtamasyz etu üşın ūşqyşsyz ūşu apparattary qoldanylyp jatqany aityldy. Al jekelegen küştık qūrylymdarda äskeri qyzmetşılerdıŋ ornalasqan jerı men fiziologiialyq jaǧdaiyn baqylauǧa mümkındık beretın arnaiy qūrylǧylar paidalanyluda.
Būdan bölek, memlekettık küştık organdar «Qazgidrometpen» özara ıs-qimyldy jolǧa qoiǧan. Osy arqyly olar aua raiynyŋ özgeruı men dauyldy eskertuler turaly aqparatty tūraqty türde alyp otyrady.
Oljas Bektenovtıŋ mälımetınşe, Memleket basşysynyŋ tapsyrmasyna säikes uäkılettı organdar äskeri reforma josparynyŋ jobasyn äzırlegen. Qūjatta äskeri basqaru jüiesın jetıldıru jäne oqu-jattyǧulardy josparlau tärtıbın bırızdendıru közdelgen.
Premer-ministr äskeri qyzmetşılerdıŋ qauıpsızdık talaptaryn mültıksız oryndauy basty mındetterdıŋ bırı bolyp qala beretının atap öttı.
Aita keteiık, 2026 jyldyŋ 24 qyrküiegınde Maŋǧystau oblysynda ötken äskeri-teŋız oqu-jattyǧuy kezınde Kaspii teŋızınde 17 äskeri qyzmetşı dauylǧa tap bolǧan. Olar jaǧalauda oqu-jauyngerlık tapsyrmalaryn oryndap jatqan sätte aua raiy kürt özgerıp, jel küşeigen. Oqiǧa saldarynan üş adam qūtqarylyp, 14 äskeri qyzmetşı suǧa ketıp, qaza tapty.
Tragediiadan keiın qorǧanys ministrlıgınde kadrlyq özgerıster bolyp, ministr men onyŋ orynbasarlary auystyryldy.
