شىمكەنت قالاسىنداعى قورعاسىن زاۋىتىنان شىققان ءتۇتىن تۇرعىندار نارازىلىعىن تۋدىرۋدا، دەپ جازادى "ادىرنا".
قۇرساي ەلدى مەكەنىندە ورنالاسقان بۇرىنعى قورعاسىن زاۋىتى قازىر التىن وندىرۋدە. تۇرعىنداردىڭ ايتۋىنشا، تۇنگى 2-3 شاماسىندا قالدىقتاردى ورتەپ باستاعان تۇتىننەن دەم الۋ مۇمكىن ەمەس. اكىمشىلىككە ەسكەرتپە ايتىلسا دا، قۇلاق اسىپ جاتقان ەشكىم جوق دەيدى قۇرسايلىقتار.
"ماسقارا ساسىق يىستەر شىعادى. شىداۋ مۇمكىن ەمەس. كىمگە ايتارىمىزدى بىلمەيمىز. ءيىس جەلمەن قالاعا بارادى. ءبىزدىڭ شاعىمدى ەشكىم تىڭداپ جاتقان جوق" دەيدى تۇرعىندار.
جسدپ پارتياسىنىڭ دەپۋتاتى نۇرلان اۋەسباەۆ شاعىمدانۋشىلاردىڭ جانايقايىن تىڭداپ شىمكەنت قالاسىنىڭ اكىمى مەن ەكولوگيا مينيسترلىگىنە جاعدايدى باقىلاۋعا الۋدى سۇرادى.
"حالىقتى تۇتىنمەن ۋلاپ جاتقان زاۋىت كىمدىكى ەكەنىن، نەلىكتەن قالانىڭ ورتاسىندا وسىنشاما جۇرتى ۋلاپ جاتقانىن، نەمەن اينالىسىپ جاتقانىن انىقتاپ، جاۋاپ بەرۋىن سۇرايمىن" دەدى ول.
ايتا كەتەيىك، كەي دەرەكتەردە اتالعان زاۋىتتىڭ بيزنەسمەن، وليگارح سەرىكجان سەيتجانوۆقا تيەسىلى ەكەنى ايتىلۋدا. سەيىتجانوۆتار وتباسى «وڭتۇستىك FTPC» كومپانياسىنا يەلىك ەتەدى، ول ارقىلى «ساۋتس ويل» جشس، Smart-Oil بۇرعىلاۋ كومپانياسى، «مۇنايقۇرىلىسسەرۆيس قۇرىلىس» جشس، «ستاندارت تسەمەنت» زاۋىتى، «كاس-بەتون» جشس، «اق-جول ترانسسەرۆيس»، «ستاندارت» جشس 51% اكتسياسىنا ۇلەسكەر.
سونداي-اق وتباسى Rixos Khadisha Shymkent, Rixos Turkestan قوناق ۇيلەرى، «ءساتتى جول» جانارماي قۇيۋ ستانتسيالارى جەلىسى، وڭتۇستىك قازاقستان مەديتسينالىق اكادەمياسى جانە شىمكەنتتەگى يننوۆاتسيالىق-تەحنولوگيالىق كوللەدجىنە يەلىك ەتەدى.
