قىرعىزستان پارلامەنتى قىرعىز تىلىنە ورىس تىلىنە قاراعاندا جوعارى مارتەبە بەرەتىن زاڭدى قابىلدادى، دەپ حابارلايدى "ادىرنا" ۇلتتىق پورتالى.
پارلامەنت سپيكەرى: «ەگەر ءبىز قىرعىز تىلىنە نەمقۇرايلى قاراساق، وندا ءبىز جاقىن جىلدارى ۇلت بولۋدان قالامىز»، – دەپ مالىمدەدى.
جاڭا زاڭعا سايكەس، راديو مەن تەلەديدارداعى كونتەنتتىڭ كەمىندە 60 پايىزى قىرعىز تىلىندە بولۋى ءتيىس، مەكەمەلەر مەن ورىنداردىڭ اتاۋلارى قىرعىز تىلىندە جازىلۋى كەرەك، ال جارناما ماتىنىندە قىرعىزشا جازۋ ورىسشادان ءىرى قارىپپەن جازىلۋعا ءتيىس.
بارلىق مەملەكەتتىك قىزمەتكەرلەر، سونىڭ ىشىندە سۋديالار، پروكۋرورلار، سايلانبالى لاۋازىمدى تۇلعالار، دەپۋتاتتار مەن مينيسترلەر قىرعىز ءتىلىن بىلۋگە مىندەتتى. بۇل تالاپ قۇقىق قورعاۋ ورگاندارى قىزمەتكەرلەرىنە دە قاتىستى. سونىمەن قاتار، قىرعىز ءتىلىن بىلمەۋ ەندى ەلدە تۇرۋعا رۇقسات بەرۋدەن باس تارتۋعا سەبەپ بولۋى مۇمكىن.
قازىر قىرعىزستانداعى 7 ميلليون حالىقتىڭ شامامەن 80 پايىزى ورىس تىلىندە سويلەيدى، ول كۇندەلىكتى قارىم-قاتىناستا كەڭىنەن قولدانىلادى. رەسمي تۇردە قىرعىز ءتىلى – مەملەكەتتىك ءتىل، ال ورىس ءتىلى – رەسمي مارتەبەگە يە.
AFP اتاپ وتكەندەي، بۇل — ۋكرايناعا قارسى رەسەيدىڭ اۋقىمدى سوعىس ارەكەتتەرىنەن كەيىن ۇلتتىق بىرەگەيلىكتى ناسيحاتتاي باستاعان پوستكەڭەستىك كەڭىستىكتەگى بەسىنشى مەملەكەت.
بۇعان دەيىن قىرعىزستاندا مەملەكەتتىك ءانۇراندى دا وزگەرتۋ تۋرالى شەشىم قابىلدانعان ەدى، سەبەبى ول كەڭەستىك ءداۋىردى ەسكە سالادى. قازىر ءانۇراننىڭ جاڭا ءماتىنى مەن اۋەنىنە ارنالعان بايقاۋ ءجۇرىپ جاتىر.
