تۇركيا قازاقستانمەن قورعانىس ونەركاسىبى سالاسىنداعى ىنتىماقتاستىقتى كەڭەيتىپ، تەرەڭدەتۋدى كوزدەپ وتىر. بۇل تۋرالى تۇركيانىڭ قورعانىس ونەركاسىبى باسقارماسىنىڭ باسشىسى حالۋك گەرگيۋن انكاراداعى پرەزيدەنتتىك كەشەندە وتكەن كەلىسسوزدەردەن كەيىن مالىمدەدى، دەپ حابارلايدى «ادىرنا» ءتىلشىسى.
كەزدەسۋ بارىسىندا تۇركيا پرەزيدەنتى رەجەپ تايپ ەردوعان قازاقستان پرەزيدەنتى قاسىم-جومارت توقاەۆتى جانە ونىڭ دەلەگاتسياسىن قابىلداعان.
حالۋك گەرگيۋننىڭ ايتۋىنشا، قورعانىس ونەركاسىبى سالاسىنداعى ءوزارا ءىس-قيمىل ەكىجاقتى قارىم-قاتىناستىڭ نەگىزگى باعىتتارىنىڭ ءبىرى سانالادى. ول تۇركيانىڭ قازاقستان ءۇشىن سەنىمدى ءارى ۇزاق مەرزىمدى سەرىكتەس ەكەنىن اتاپ ءوتىپ، ەلدىڭ قورعانىس ونەركاسىبى سوڭعى 25 جىلدا قارقىندى دامىعانىن جەتكىزدى.
ۆەدومستۆو باسشىسى تۇرىك قورعانىس ونىمدەرىنىڭ باسەكەگە قابىلەتتى ەكەنىن دە اتاپ ءوتتى. سونداي-اق انكارا سەرىكتەس ەلدەرمەن بىرلەسكەن ءوندىرىستى دامىتۋعا ىقپال ەتەتىن ساياسات جۇرگىزۋگە دايىن ەكەنىن مالىمدەدى.
ء«بىز دوستاس ءارى باۋىرلاس قازاقستانمەن ءوزارا تيىمدىلىك نەگىزىندە ىنتىماقتاستىق باعىتتارىن ءارتاراپتاندىرىپ، ودان ءارى تەرەڭدەتۋدى كوزدەيمىز»، – دەپ جازدى حالۋك گەرگيۋن NSosyal الەۋمەتتىك جەلىسىندەگى پاراقشاسىندا.
ونىڭ سوزىنشە، ەكى ەلدىڭ تاجىريبەسىن ۇشتاستىرۋ تۇركى الەمىندەگى قاۋىپسىزدىك پەن وركەندەۋدى نىعايتۋعا ىقپال ەتەدى.
