Memleket basşysy Qasym-Jomart Toqaev Qazaqstannyŋ tranzittık äleuetın tolyq paidalanu üşın jol infraqūrylymy men äue jük tasymaly salasyn damytu qajet ekenın aitty. Būl turaly prezident Joldauynda mälımdedı, dep habarlaidy «Adyrna» tılşısı.
Prezidenttıŋ sözınşe, sapaly joldar men zamanaui jol boiy qyzmet körsetu infraqūrylymy bolmasa, Qazaqstan jahandyq tranzittık dälız nemese Euraziianyŋ kölık-logistikalyq haby märtebesıne ie bola almaidy.
Memleket basşysy şekaradaǧy kölık keptelısterın de özektı mäsele retınde atap öttı. Onyŋ pıkırınşe, şekaradaǧy ötkızu qabıletınıŋ tömendıgı eldıŋ tranzittık saladaǧy köşbasşylyqqa ūmtylysyna kedergı keltıredı.
«Eger şekara bırneşe şaqyrymǧa sozylatyn kölık keptelısterıne sebep bolatyn «tar ötkelge» ainalsa, al däl qazır jaǧdai osyndai bolsa, Qazaqstannyŋ köşbasşylyǧy turaly söz qozǧaudyŋ özı mümkın emes», – dedı Qasym-Jomart Toqaev.
Prezident Europa men Aziiany bailanystyratyn negızgı äue dälızderı Qazaqstannyŋ aumaǧy arqyly ötetının aityp, būl mümkındıktı tiımdı paidalanu qajettıgın jetkızdı. Ol üşın jerüstı servistık infraqūrylymdy damytu maŋyzdy ekenın atap öttı.
Sonymen qatar memleket basşysy äue jük tasymaly salasyndaǧy «Air Cargo» jeke kompaniiasynyŋ jūmysyna toqtaldy. Onyŋ aituynşa, kompaniianyŋ qarjylandyru mümkındıgı mol, şeteldık bılıktı mamandardy tartuǧa jäne derbes şeşım qabyldauǧa äleuetı bar. Alaida äzırge naqty nätijeler baiqalmai otyr.
«Sızderge senım bıldırıldı. Endı naqty nätije kütemız», – dedı prezident.
Memleket basşysy Qazaqstannyŋ tranzittık äleuetın ıske asyru üşın infraqūrylymdy damytu jäne qolda bar mümkındıkterdı ekonomikalyq tabysqa ainaldyru qajettıgın basa aitty.
