مەملەكەت باسشىسى قاسىم-جومارت توقاەۆ كرەاتيۆتى يندۋستريانى دامىتۋ قورىنىڭ كەڭسەسىن ارالاپ كوردى. بۇل تۋرالى اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
قاسىم-جومارت توقاەۆ قور جۇمىسىمەن تانىستى. بۇل مەملەكەت باسشىسىنىڭ تاپسىرماسىنا ساي وتاندىق كرەاتيۆتى سەكتوردى قولداۋدىڭ نەگىزگى ينستيتۋتى رەتىندە قۇرىلعان.
پرەزيدەنتكە جاڭا كەڭىستىكتىڭ شىعارماشىل جاستار، ينۆەستورلار مەن تۋريستەر باس قوساتىن ورىنعا اينالاتىنى جونىندە باياندالدى.
شوۋرۋم فورماتىندا بەزەندىرىلگەن كەڭسەدە كرەاتيۆتى ءونىم ازىرلەۋدىڭ تولىق تسيكلى كورسەتىلگەن. سول ارقىلى كوپشىلىك قاراپايىم يدەيانى وندىرىسكە اينالدىرۋعا دەيىنگى شىعارماشىلىق ءۇردىستىڭ قالاي جۇرگىزىلەتىنىن تاماشالاي الادى.
مەملەكەت باسشىسى زەرگەرلىك جانە اعاش شەبەرحانالارىن، مۋزىكا، كىلەم توقۋ، بەينەلەۋ ونەرى زالدارىن، fashion-ايماقتى ارالادى.
Yurt Capsule – مۇنداعى نەگىزگى ورىننىڭ ءبىرى. بۇل كەڭىستىكتە كيىز ءۇيدىڭ ءداستۇرلى فورماسى تەحنولوگيالىق تۇرعىدان جاڭا كەيىپكە ەنگەن. جوبا تسيفرلىق ونەردى، مۋلتيمەديالىق كونتەنتتى جانە مادەني ستوريتەللينگتى ءبىر ارناعا توعىستىرادى.
قاسىم-جومارت توقاەۆقا ەلىمىزدىڭ برەندىن قالىپتاستىرۋ تۇجىرىمداماسى جايىندا مالىمەت بەرىلدى. باستاما مادەني مۇرالارىمىزدى زامانعا ساي جاڭاشا ينتەرپرەتاتسيالاۋ، كرەاتيۆتى يندۋستريانى دامىتۋ جانە ۇلتتىق بىرەگەيلىكتى نىعايتۋ ارقىلى ەلىمىزدىڭ تۋريستىك الەۋەتىن ارتتىرۋدى كوزدەيدى.
كرەاتيۆتى يندۋستريانى دامىتۋ قورى تالانتتى جاستاردى ىزدەپ تاۋىپ، ولارعا قولداۋ كورسەتۋ، ينۆەستيتسيا تارتۋ، ينفراقۇرىلىمدى جەتىلدىرۋ سەكىلدى ءتورت نەگىزگى باعىت بويىنشا جۇمىس ىستەيدى. وتاندىق كرەاتيۆتى ونىمدەردى سىرتقى نارىققا شىعارۋعا ىقپال ەتەدى. سونىمەن قاتار بارلىق وبلىس ورتالىعىندا اشىلعان وڭىرلىك حابتاردىڭ قىزمەتىن ۇيلەستىرەدى.
بۇگىندە قازاقستاننىڭ كرەاتيۆتى ەكونوميكا سالاسىندا شامامەن 48 مىڭ كاسىپكەرلىك نىسان بار. ولار 160 مىڭعا جۋىق ادامدى جۇمىسپەن قامتىپ وتىر. يندۋسترياعا كينو، انيماتسيا، گەيمدەۆەلوپمەنت، تسيفرلىق ونەر، ءسان، ديزاين جانە حالىقتىق قولونەر سەكىلدى سالالار زور ۇلەس قوسۋدا.
