رەسەي پرەزيدەنتى ۆلاديمير پۋتين 2026 جىلى فەدەرالدىق جينالىسقا جولداۋ جاسامايدى. بۇل تۋرالى 25 قازاندا مەملەكەت باسشىسىنىڭ ءباسپاسوز حاتشىسى دميتري پەسكوۆ مالىمدەدى، دەپ حابارلايدى «ادىرنا» ءتىلشىسى DW-گە سىلتەمە جاساپ.
ول پۋتين فەدەرالدىق جينالىسقا جولداۋدى ء«وزى قاجەت دەپ تاپقان كەزدە» جاريالايتىنىن اتاپ ءوتتى.
رەسەي پرەزيدەنتىنىڭ جىل سايىن فەدەرالدىق جينالىسقا جولداۋ جاساۋ مىندەتى رەسەي كونستيتۋتسياسىنىڭ 84-بابىنىڭ «ە» تارماقشاسىندا بەكىتىلگەن.
وتكەن جىلى دا پۋتين فەدەرالدىق جينالىسقا جولداۋ جاساعان جوق. ول سوڭعى رەت 2024 جىلعى 29 اقپاندا، پرەزيدەنتتىك بەسىنشى مەرزىمگە سايلاناردان از ۋاقىت بۇرىن ءسوز سويلەگەن. سول كەزدە پۋتين جاڭا ۇلتتىق جوبالاردىڭ باستالاتىنىن جاريالاپ، ءىس جۇزىندە ءوزىنىڭ سايلاۋالدى باعدارلاماسىن ۇسىنعان.
رەسەي پرەزيدەنتىنىڭ 2022 جىلعى 30 قىركۇيەكتە فەدەرالدىق جينالىس الدىندا سويلەگەن ءسوزى ۋكراينانىڭ اننەكسيالانعان اۋماقتارىن رەسەي قۇرامىنا قوسۋ تۋرالى كەلىسىمدەرگە قول قويۋ راسىمىنە ورايلاستىرىلعان ەدى. اڭگىمە ءوزىن-ءوزى جاريالاعان «دحر» مەن «لحر»، سونداي-اق ۋكراينانىڭ رەسەي اسكەرلەرى باسىپ العان حەرسون جانە زاپوروجە وبلىستارىنىڭ بولىكتەرى تۋرالى بولدى. كرەملدىڭ ۇلكەن سارايىنداعى گەورگي زالىندا جينالعاندار الدىندا سويلەگەن سوزىندە پۋتين نەگىزىنەن رەسەيدىڭ باتىسپەن جانە «انگلوساكستارمەن» تەكەتىرەسىنە باسىمدىق بەرگەن.
