قىرعىزستاندا مەملەكەتتىك ءتىل ەمتيحانىن تاپسىرۋ كورسەتكىشى قانداي؟

فوتو جي كومەگىمەن جاسالعان

قىرعىزستاندا بيىل قاڭتاردان قازانعا دەيىن مەملەكەتتىك ءتىلدى مەڭگەرۋ دەڭگەيىن انىقتايتىن تەستىلەۋگە 21,5 مىڭنان استام ادام قاتىسقان، دەپ حابارلايدى "ادىرنا" ۇلتتىق پورتالى.

الايدا ولاردىڭ 3,8 مىڭنان ءسال استامى عانا ەمتيحاندى العاشقى تالپىنىستا ءساتتى تاپسىرعان. بۇل جالپى قاتىسۋشىلاردىڭ شامامەن 18 پايىزى. مۇنداي مالىمەتتى 24kg باسىلىمى جاريالادى.

باسىلىم اشىق دەرەككوزدەردە ورنالاستىرىلعان «كىرعىزتەست» فايلدارىن تالداعان. مالىمەتتەرگە سايكەس، اتالعان كەزەڭدە ەلدە 30,5 مىڭنان استام تەستىلەۋ وتكىزىلگەن. كەيبىر ازاماتتار العاشقى تالپىنىستا قاجەتتى بالل جيناي الماعاندىقتان، ەمتيحاندى بىرنەشە رەت تاپسىرعان.

العاشقى تالپىنىستا جانە ەكىنشى رەت تاپسىرعاندا قاجەتتى بالل جيناعانداردىڭ ناتيجەسىن قوسا ەسەپتەگەندە، مەملەكەتتىك ءتىلدى مەڭگەرگەنىن راستاعان ازاماتتاردىڭ ۇلەسى بارلىق تەستىلەۋدىڭ 41 پايىزىنا جەتكەن.

«كىرگىزتەست» ۇيىمىنىڭ مالىمەتىنشە، جىل باسىنان بەرى ەمتيحاندى قاي تالپىنىستا تاپسىرعانىنا قاراماستان، 13,3 مىڭعا جۋىق ادام مەملەكەتتىك ءتىلدى مەڭگەرۋدىڭ قاجەتتى دەڭگەيىن راستاعان. بۇل بارلىق تەستىلەۋدىڭ 43,5 پايىزىنا تەڭ. 

قىرعىز تىلىنەن تەستىلەۋگە قوعامنىڭ نازارى پرەزيدەنتتىككە ۇمىتكەرلەر ومۇربەك سۋۆاناليەۆ پەن سايمىك جاپىكەەۆتىڭ ەمتيحاننان وتە الماۋىنان كەيىن ارتقان. ولار تاپسىرمالاردىڭ جەكەلەگەن بولىمدەرى بويىنشا قاجەتتى بالل جيناي الماعاندىقتان، پرەزيدەنت سايلاۋىنا قاتىسۋ قۇقىعىنا يە بولماعان. دەگەنمەن ساياساتكەرلەرگە تەستىلەۋدى قايتا تاپسىرۋ مۇمكىندىگى بەرىلگەن.

وسى جاعدايعا بايلانىستى قوعام قايراتكەرى يليم كارىپبەكوۆ ەمتيحاننىڭ كۇردەلىلىگىن جەكە تەكسەرۋ ءۇشىن تەست تاپسىرعان. تەستىلەۋدەن كەيىن ول ەمتيحاننان تەك قىرعىز ءتىلىن ناشار بىلەتىن نەمەسە ادەيى وتە المايتىن ادامدار عانا ءسۇرىنۋى مۇمكىن دەگەن پىكىر بىلدىرگەن.

«كىرعىزتەست» – ازاماتتاردىڭ قىرعىز ءتىلىن مەڭگەرۋ دەڭگەيىن باعالايتىن مەملەكەتتىك جۇيە. ەمتيحان بەس بولىمنەن تۇرادى:

• لەكسيكا جانە گرامماتيكا;

• تىڭدالىم;

• وقىلىم;

• جازىلىم;

• سويلەۋ.

ءتىل ءبىلۋ دەڭگەيى A1 (باستاپقى) مەن C1 (جوعارى) ارالىعى بويىنشا باعالانادى. تەست تاپسىرمالارىن ورىنداۋعا 2 ساعات 50 مينۋت بەرىلەدى.

مەملەكەتتىك ءتىلدى مەڭگەرۋگە قويىلاتىن تالاپ قىزمەتكەرلەردىڭ ساناتىنا بايلانىستى. قازىر مەملەكەتتىك قىزمەتشىلەردەن قىرعىز ءتىلىن B1 دەڭگەيىندە ءبىلۋ تالاپ ەتىلەدى. ال 2027 جىلدان باستاپ بۇل تالاپ B2 دەڭگەيىنە دەيىن كوتەرىلەدى.

ەتنيكالىق ازشىلىق وكىلدەرىنە ازىرگە A2 دەڭگەيى جەتكىلىكتى. الايدا 2028 جىلدان باستاپ ولار ءۇشىن دە تالاپ B1 دەڭگەيىنە دەيىن كۇشەيتىلەدى.