قىرعىزستان كونستيتۋتسيالىق سوتى كەزەكتى پرەزيدەنت سايلاۋى وتەتىن كۇندى بەكىتتى، دەپ حابارلايدى "ادىرنا" ۇلتتىق پورتالى.
فەرعانا اگەنتتىگىنىڭ مالىمەتىنشە، 17 اقپاندا قازىرگى مەملەكەت باسشىسى سادىر جاپاروۆتىڭ ءوتىنىشىن قاراعاننان كەيىن، كەلەسى كەزەكتەگى پرەزيدەنت سايلاۋى 2027 جىلدىڭ ءتورتىنشى جەكسەنبىسىندە وتەدى.
سوت جاپاروۆتىڭ وكىلەتتىك مەرزىمىنىڭ ۇزاقتىعىن تالقىلادى. ول 2010 جىلعى كونستيتۋتسيا بويىنشا 2021 جىلى 28 قاڭتاردا التى جىلدىق مەرزىمگە پرەزيدەنت بولىپ سايلانعان. 2021 جىلعى كونستيتۋتسيادا پرەزيدەنتتىڭ وكىلەتتىك مەرزىمى بەس جىل دەپ بەلگىلەنىپ، ءبىر ادامعا ەكى مەرزىمنەن ارتىق سايلانباۋ شەكتەۋى ەنگىزىلگەن. ال 2010 جىلعى رەداكتسيادا ءبىر ادام تەك ءبىر رەت قايتا سايلانا المايتىن التى جىلدىق مەرزىم قاراستىرىلعان.
كونستيتۋتسيالىق سوت شەشىمگە كەلىپ، 2021 جىلعى كونستيتۋتسياداعى بەس جىلدىق مەرزىم قازىرگى پرەزيدەنتتىڭ وكىلەتتىگىنە قولدانىلمايتىنىن انىقتادى. اعىمداعى مەرزىم باستاپقىدا بەلگىلەنگەن التى جىلدىق مەرزىمگە سايكەس اياقتالۋى ءتيىس، ال بۇل مەرزىم ەكى مەرزىم ەرەجەسى بويىنشا ءبىرىنشى مەرزىم رەتىندە ەسەپتەلەدى. سوتتىڭ بۇل ۇستانىمى زاڭدىلىقتىڭ ساباقتاستىعى پرينتسيپىنە نەگىزدەلگەن.
سوت سونىمەن قاتار مەرزىمىنەن بۇرىن سايلاۋ تەك 2021 جىلعى كونستيتۋتسيانىڭ 72-بابىنىڭ 1-تارماعىندا كورسەتىلگەن سەبەپتەر بويىنشا عانا مۇمكىن ەكەنىن اتاپ ءوتتى. ءوتىنىش بويىنشا قىزمەتتەن كەتۋ، بەلگىلەنگەن تارتىپپەن وتستاۆكاعا جىبەرۋ، اۋرۋ نەمەسە ءولىم جاعدايىندا پرەزيدەنتتىڭ وكىلەتتىگىن اتقارا الماۋى.
وسى نەگىزدە كونستيتۋتسيالىق سوت قىرعىزستانداعى كەلەسى پرەزيدەنت سايلاۋىنىڭ 2027 جىلدىڭ 24 قاڭتارىندا وتەتىنىن بەكىتتى. ەلدىڭ جوعارى كەڭەسى سايلاۋدى داۋىس بەرۋ كۇنىنەن كەمىندە ءتورت اي بۇرىن، ياعني 2026 جىلدىڭ 24 قىركۇيەگىنە دەيىن تاعايىنداۋى ءتيىس.
