Foto Jİ kömegımen jasalǧan
Qyrǧyzstanda biyl qaŋtardan qazanǧa deiın memlekettık tıldı meŋgeru deŋgeiın anyqtaityn testıleuge 21,5 myŋnan astam adam qatysqan, dep habarlaidy "Adyrna" ūlttyq portaly.
Alaida olardyŋ 3,8 myŋnan säl astamy ǧana emtihandy alǧaşqy talpynysta sättı tapsyrǧan. Būl jalpy qatysuşylardyŋ şamamen 18 paiyzy. Mūndai mälımettı 24kg basylymy jariialady.
Basylym aşyq derekközderde ornalastyrylǧan «Kyrǧyztest» faildaryn taldaǧan. Mälımetterge säikes, atalǧan kezeŋde elde 30,5 myŋnan astam testıleu ötkızılgen. Keibır azamattar alǧaşqy talpynysta qajettı ball jinai almaǧandyqtan, emtihandy bırneşe ret tapsyrǧan.
Alǧaşqy talpynysta jäne ekınşı ret tapsyrǧanda qajettı ball jinaǧandardyŋ nätijesın qosa eseptegende, memlekettık tıldı meŋgergenın rastaǧan azamattardyŋ ülesı barlyq testıleudıŋ 41 paiyzyna jetken.
«Kyrgyztest» ūiymynyŋ mälımetınşe, jyl basynan berı emtihandy qai talpynysta tapsyrǧanyna qaramastan, 13,3 myŋǧa juyq adam memlekettık tıldı meŋgerudıŋ qajettı deŋgeiın rastaǧan. Būl barlyq testıleudıŋ 43,5 paiyzyna teŋ.
Qyrǧyz tılınen testıleuge qoǧamnyŋ nazary prezidenttıkke ümıtkerler Ömürbek Suvanaliev pen Saimyk Japykeevtıŋ emtihannan öte almauynan keiın artqan. Olar tapsyrmalardyŋ jekelegen bölımderı boiynşa qajettı ball jinai almaǧandyqtan, prezident sailauyna qatysu qūqyǧyna ie bolmaǧan. Degenmen saiasatkerlerge testıleudı qaita tapsyru mümkındıgı berılgen.
Osy jaǧdaiǧa bailanysty qoǧam qairatkerı İlim Karypbekov emtihannyŋ kürdelılıgın jeke tekseru üşın test tapsyrǧan. Testıleuden keiın ol emtihannan tek qyrǧyz tılın naşar bıletın nemese ädeiı öte almaityn adamdar ǧana sürınuı mümkın degen pıkır bıldırgen.
«Kyrǧyztest» – azamattardyŋ qyrǧyz tılın meŋgeru deŋgeiın baǧalaityn memlekettık jüie. Emtihan bes bölımnen tūrady:
• leksika jäne grammatika;
• tyŋdalym;
• oqylym;
• jazylym;
• söileu.
Tıl bılu deŋgeiı A1 (bastapqy) men C1 (joǧary) aralyǧy boiynşa baǧalanady. Test tapsyrmalaryn oryndauǧa 2 saǧat 50 minut berıledı.
Memlekettık tıldı meŋgeruge qoiylatyn talap qyzmetkerlerdıŋ sanatyna bailanysty. Qazır memlekettık qyzmetşılerden qyrǧyz tılın B1 deŋgeiınde bılu talap etıledı. Al 2027 jyldan bastap būl talap B2 deŋgeiıne deiın köterıledı.
Etnikalyq azşylyq ökılderıne äzırge A2 deŋgeiı jetkılıktı. Alaida 2028 jyldan bastap olar üşın de talap B1 deŋgeiıne deiın küşeitıledı.
