Respublika künı qarsaŋynda Şymkent qalasynda Qazaqstannyŋ ūlttyq merekesıne arnalǧan saltanatty ıs-şara öttı. Merekelık keşke qala äkımı Ǧabit Syzdyqbekov, memlekettık organdardyŋ, qoǧamdyq ūiymdardyŋ ökılderı men eŋbek ūjymdarynyŋ müşelerı qatysty.
Qala äkımı köpşılıktı Respublika künımen qūttyqtap, käsıbi qyzmetınde erekşelengen, eldıŋ damuyna eleulı üles qosqan azamattarǧa Qazaqstan Respublikasy Prezidentınıŋ atynan memlekettık nagradalar tabystady.
Megapolis basşysy merekenıŋ tarihi maŋyzyna toqtalyp öttı. 1990 jylǧy 25 qazanda Memlekettık egemendık turaly deklarasiianyŋ qabyldanuy Qazaqstan memlekettılıgınıŋ qalyptasuyndaǧy maŋyzdy kezeŋ bolyp, elımızdıŋ Täuelsızdıkke qarai jasaǧan qadamdaryna jol aşty.
«Biyl būl mereke Qazaqstannyŋ jaŋa tarihi belesı – Täuelsızdıktıŋ 35 jyldyǧymen tūspa-tūs kelıp otyr. Egemendık pen eldıktıŋ negızderın saqtau jäne nyǧaitu – ärqaisymyzdyŋ ortaq mındetımız», – dedı Ǧabit Syzdyqbekov.
Qala äkımı, sonymen qosa, elımızde jalpy ūlttyq referendum qorytyndysy boiynşa qabyldanǧan jaŋa Konstitusiia negızınde saiasi jäne qoǧamdyq jaŋaru üderısterı jalǧasyp jatqanyn atap öttı. Ata zaŋ memlekettık basqaru jüiesın jetıldıruge, ädıldık pen zaŋ üstemdıgın nyǧaituǧa negız boldy.
Şymkenttıŋ damuy turaly söz qozǧaǧan qala äkımı megapolistıŋ jetıstıkterıne tūrǧyndardyŋ qosyp otyrǧan ülesınıŋ maŋyzyn atap öttı. Bügınde qalanyŋ ekonomikalyq äleuetı artyp, investisiialar jūmyldyruda, infraqūrylymdy jetıldırıp, bılım, mädeniet jäne sport salalaryndaǧy mümkındıkterı keŋeiıp keledı. Būl baǧyttar halyqtyŋ ömır süru sapasyn arttyruǧa jäne qalanyŋ odan ärı damuyna yqpal etedı.
Saltanatty ıs-şara «Bügıngı Qazaqstan» atty muzykalyq-teatrlandyrylǧan qoiylymmen jalǧasyp, merekelık konserttık baǧdarlamamen qorytyndylandy.
