بۇگىن جەتىسۋ وبلىسىنىڭ اكىمى بەيبىت يساباەۆ ءوڭىردىڭ ۇزدىك اۋىل شارۋاشىلىعى قىزمەتكەرلەرىن ماراپاتتاۋ ءراسىمىن وتكىزىپ، ولاردىڭ بىرقاتارىنا ەل پرەزيدەنتىنىڭ اتىنان مەملەكەتتىك ناگرادالار تابىستادى، دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
- بيىل استانادا ەل تاريحىندا تۇڭعىش رەت اۋىل شارۋاشىلىعى قىزمەتكەرلەرىنىڭ I فورۋمى ءوتىپ، سونىڭ اياسىندا مەملەكەت باسشىسى ەلىمىزدىڭ ءار وڭىرىنەن، سونىڭ ىشىندە جەتىسۋ وبلىسىنان بارعان اۋىل شارۋاشىلىعى سالاسىنىڭ وكىلدەرىن ماراپاتتادى. ەكونوميكانىڭ ءوسۋى اۋىل شارۋاشىلىعىنىڭ دامۋىنا تىكەلەي بايلانىستى. ءبىزدىڭ ءوڭىردىڭ تابيعي-كليماتتىق جاعدايىنىڭ قولايلىلىعى وسى ماڭىزدى سالانىڭ دامۋىنا ۇلكەن ىقپال ەتەدى. بۇل رەتتە ءبىزدىڭ وڭىردە وسىرىلەتىن اۋىل شارۋاشىلىعى ونىمدەرىنىڭ شامامەن 65%-ى وزىمىزدە وڭدەلەدى. بيىل نەگىزگى اۋىل شارۋاشىلىعى داقىلدارىنان جوعارى ءونىم الدىق. ماسەلەن، وسى جىلى وبلىستا العاش رەت 640 مىڭ توننا قانت قىزىلشاسىن الامىز. جالپى 510,1 مىڭ گەكتار ەگىس القابىنان 2,1 ملن.توننا اۋىل شارۋاشىلىعى داقىلدارى جينالادى دەپ كۇتىلۋدە. وسى جەتىستىكتەردىڭ بارلىعىندا سىزدەردىڭ قاجىرلى ەڭبەكتەرىڭىز، ۇلكەن ۇلەستەرىڭىز بار. ءبىز ءوز تاراپىمىزدان مەملەكەتتىك قولداۋ كورسەتۋدى جالعاستىرامىز. مىسالى، بيىل ءوڭىردىڭ اگروونەركاسىپ كەشەنىن قولداۋعا بيۋدجەتتەن 35 ملرد. تەڭگە ءبولىندى، - دەپ اتاپ وتكەن وبلىس اكىمى ب. يساباەۆ ءوڭىردىڭ اۋىل شارۋاشىلىعىن دامىتۋعا قوسقان ۇلەسى ءۇشىن شارۋاشىلىق وكىلدەرىنە العىسىن ءبىلدىرىپ، ماراپاتتاۋ راسىمىنە كوشتى.
«پاراسات» وردەنىمەن تالدىقورعان قالاسىنداعى «ساماي» شارۋا قوجالىعىنىڭ باسشىسى ەركىمبەك سلياموۆ ماراپاتتالدى. ول ءوزىنىڭ شارۋا قوجالىعىنىڭ جۇمىسىن 30 جىلعا جۋىق ۋاقىت بويى جۇرگىزىپ، ەگىنشىلىكپەن، جانە مال شارۋاشىلىعىمەن قاتار اينالىسىپ كەلەدى. قانت قىزىلشاسى، جۇگەرى، سويا، بيداي، ارپا، سونداي-اق ءىرى قارا مەن جىلقى وسىرەدى. شارۋاشىلىقتا 50-گە جۋىق اۋىل شارۋاشىلىعى تەحنيكاسى بار.
ال اقسۋ اۋدانىنان «داۋلەت» شارۋا قوجالىعىنىڭ باسشىسى داۋلەت ءبيادىلوۆ پەن الاكول اۋدانىنان «اسىل تۇياق» جشس قۇرىلتايشىسى، باس ديرەكتورى دۋمان ناعاشبەكۇلى «قۇرمەت» وردەنىنە يە بولدى.
داۋلەت كوشەربايۇلى اۋىل شارۋاشىلىعى سالاسىندا 22 جىلدان بەرى ەڭبەك ەتىپ كەلەدى. نەگىزگى باعىتى – قىزىلشا ءوسىرۋ. بۇگىنگى تاڭدا «داۋلەت-ب» شارۋا قوجالىعى - اقسۋ قانت زاۋىتىنا قىزىلشا وتكىزەتىن اۋدانداعى ءىرى شارۋاشىلىقتىڭ ءبىرى. سونىمەن قاتار فەرمەر اۋداننىڭ از قامتىلعان جانە كوپ بالالى وتباسىلارىنا تۇراقتى قولداۋ كورسەتىپ، قايىرىمدىلىقپەن بەلسەندى اينالىسىپ كەلەدى.
سول سياقتى «اسىل تۇياق» جشس اسىل تۇقىمدى ءىرى قارا مەن قوي ءوسىرىپ، مالدىڭ جاڭا تۇقىمدارىن شىعارادى. ءسويتىپ ەكسپورتتىق الەۋەتىن ارتتىرىپ، ەتتى مال شارۋاشىلىعىن دامىتۋعا ەلەۋلى ۇلەس قوسىپ ءجۇر.
ءوڭىردىڭ اۋىل شارۋاشىلىعىن دامىتۋعا قوسقان ۇلەسى ەسكەرىلىپ، 2002 جىلدان باستاپ كەربۇلاق اۋدانىنداعى «نۇرقادام» شق جۇرگىزۋشىسى ءارى مەحانيزاتورى بولىپ جۇرگەن نۇربول سايداقۇلوۆ «ەرەن ەڭبەگى ءۇشىن» مەدالىمەن ماراپاتتالدى.
ماراپاتتالعانداردىڭ اتىنان «ساماي» شق باسشىسى ەركىمبەك سلياموۆ سويلەدى.
- مەنىڭ شارۋاشىلىعىمنىڭ جەرى تاستى. سوندىقتان جوعارى ونىمدىلىككە قول جەتكىزۋ وتە قيىن. بىراق قازىرگى زامانعى تەحنيكانىڭ، اگروتەحنولوگيالاردى ساقتاۋدىڭ، مەملەكەت تاراپىنان كورسەتىلەتىن قولداۋدىڭ جانە شىدامدىلىقتىڭ ارقاسىندا قازىر وسى ۋچاسكەلەردەن 550-600 تسەنتنەردەن قانت قىزىلشاسىن الىپ وتىرمىن. ءبىز تابىستى دامۋدىڭ وسى قارقىنىن ساقتاپ قالۋعا بار كۇش-جىگەرىمىزدى جۇمسايمىز، - دەدى ول.
ەسكە سالساق، جۋىردا استانا قالاسىندا وتكەن اۋىل شارۋاشىلىعى قىزمەتكەرلەرىنىڭ I فورۋمىندا جەتىسۋ وبلىسىنىڭ تاعى ءبىر شارۋاشىلىعىنىڭ وكىلى، پانفيلوۆ اۋدانىندا تامشىلاتىپ سۋارۋ تەحنولوگياسىمەن جۇمىس ىستەيتىن «ايگەرىم» شارۋا قوجالىعىنىڭ باسشىسى ۇلان سارپەكوۆ پرەزيدەنتتىڭ قولىنان «قۇرمەت» وردەنىن العان بولاتىن.
جالپى جەتىسۋ وبلىسىندا 10 ايدىڭ قورىتىندىسى بويىنشا اۋىل شارۋاشىلىعى ءونىمىنىڭ كولەمى 362 ملرد. تەڭگەدەن استى، ال جىل قورىتىندىسى بويىنشا بۇل كورسەتكىشتى 102,5%-عا، ياعني 518,2 ملرد. تەڭگەگە جەتكىزۋ جوسپارلانىپ وتىر.
