رەسپۋبليكا كۇنىنە وراي الماتىدا مەملەكەتتىك ناگرادالاردى تاپسىرۋ ءراسىمى ءوتتى. قالا اكىمى دارحان ساتىبالدى قازاقستان پرەزيدەنتى قاسىم-جومارت توقاەۆتىڭ اتىنان مەملەكەتتىك جانە قوعامدىق قىزمەتتەگى ەڭبەگى، ەلدىڭ الەۋمەتتىك-ەكونوميكالىق جانە مادەني دامۋىنا قوسقان ۇلەسى، حالىقتار اراسىنداعى دوستىق پەن ىنتىماقتاستىقتى نىعايتۋعا سىڭىرگەن ەڭبەگى ءۇشىن 89 الماتىلىقتى ماراپاتتادى.
ماراپات يەلەرىنىڭ قاتارىندا ونەركاسىپ، كوممۋنالدىق شارۋاشىلىق، مەديتسينا، ءبىلىم بەرۋ، مادەنيەت جانە سپورت سالالارىنىڭ وكىلدەرى بار.
قالا باسشىسى قۇتتىقتاۋ سوزىندە 1990 جىلعى 25 قازاندا الماتىدا قازاق كسر-ءىنىڭ مەملەكەتتىك ەگەمەندىگى تۋرالى دەكلاراتسيا قابىلدانعان كۇننىڭ ەرەكشە تاريحي ماڭىزىنا توقتالدى. بۇل قۇجات قازاقستاننىڭ دەربەس مەملەكەت رەتىندە قالىپتاسۋىنىڭ ساياسي-قۇقىقتىق نەگىزىن قالاپ، ەلدىڭ ودان ءارى دامۋ جولىن ايقىندادى.
«رەسپۋبليكا كۇنى – مەملەكەتتىلىگىمىزدىڭ، بىرلىگىمىز بەن ەل بولاشاعىنا دەگەن ورتاق جاۋاپكەرشىلىگىمىزدىڭ سيمۆولى. قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ بۇل مەرەكەنىڭ ۇلتتىق رۋحتى، مەملەكەتتىلىكتى، قوعامداعى بىرلىك پەن كەلىسىمدى نىعايتاتىنىن اتاپ وتكەن بولاتىن. بۇگىندە وسى قۇندىلىقتاردى ساقتاۋ، ءار ادامنىڭ ەڭبەگىن قۇرمەتتەۋ جانە قازاقستاننىڭ ودان ءارى دامۋى جولىندا بىرلەسە جۇمىس ىستەۋ ايرىقشا ماڭىزدى»، – دەدى دارحان ساتىبالدى.
ونىڭ ايتۋىنشا، الماتىنىڭ ەكونوميكالىق كورسەتكىشتەرى تۇراقتى ءوسىپ كەلەدى. قالا ەكونوميكاسىنىڭ كولەمى 72 ملرد دوللارعا جۋىقتاپ، جان باسىنا شاققانداعى جالپى وڭىرلىك ءونىم 30 مىڭ دوللاردان استى.
دارحان ساتىبالدى كاسىپورىنداردىڭ، كوممۋنالدىق قىزمەتتەردىڭ، كولىك جۇيەسىنىڭ، مەديتسينالىق جانە ءبىلىم بەرۋ ۇيىمدارىنىڭ جۇمىسىن قامتاماسىز ەتىپ جۇرگەن ازاماتتاردىڭ ەڭبەگىن ەرەكشە اتاپ ءوتتى. ولاردىڭ قاتارىندا ينجەنەرلەر، قۇرىلىسشىلار، كاسىپكەرلەر جانە باسقا دا ماماندىق يەلەرى بار.
«الماتىنىڭ باستى كۇشى – ونىڭ تۇرعىندارى. ولار مىندەتىن ادال اتقارىپ، بالالارعا ءبىلىم بەرەتىن، ادام ومىرىنە اراشا تۇسەتىن، قالالىق قىزمەتتەردىڭ ۇزدىكسىز جۇمىسىن قامتاماسىز ەتەتىن، جاڭا كاسىپورىندار اشىپ، مادەنيەتتى دامىتادى. ولاردىڭ جاۋاپكەرشىلىگى مەن ءوز ىسىنە دەگەن ادالدىعىنىڭ ارقاسىندا قالامىز دامىپ، جاڭا مۇمكىندىكتەرگە جول اشىلىپ كەلەدى. ەڭبەك ادامىنا قۇرمەت كورسەتۋ قوعامىمىزدىڭ باستى قۇندىلىقتارىنىڭ ءبىرى بولىپ قالۋعا ءتيىس»، – دەدى الماتى اكىمى.
سالتاناتتى راسىمدە ءتۇرلى بۋىن وكىلدەرى مەن ءار سالا ماماندارى ماراپاتتالدى. ولاردىڭ قاتارىندا ونەركاسىپ جانە كوممۋنالدىق كاسىپورىنداردىڭ قىزمەتكەرلەرى، دارىگەرلەر، پەداگوگتەر، عالىمدار، مادەنيەت پەن ونەر قايراتكەرلەرى، سپورتشىلار، كاسىپكەرلەر جانە قوعام قايراتكەرلەرى بار.
اتاپ ايتقاندا، وندىرىستىك جانە تەحنيكالىق سالا ماماندارى – «الماتى قالا جارىق» كومپانياسىنىڭ تەحنيكالىق قىزمەت كورسەتۋ مامانى ماقۇلبەك كۇزەمباەۆ، «الماتىجىلۋجايەنەرگو» كاسىپورنىنىڭ سلەسارى كونستانتين پوپوۆ جانە «اكقز» كاسىپورنىنىڭ تەحنيكالىق ديرەكتورى تۋگلۋك حۋدايبەرديەۆ III دارەجەلى «ەڭبەك داڭقى» وردەنىمەن ماراپاتتالدى.
كوممۋنالدىق ينفراقۇرىلىم مەن قوعامدىق كولىك سالاسىنىڭ وكىلدەرى، سونىڭ ىشىندە «الماتى تازالىق» كاسىپورنىنىڭ ارنايى تەحنيكا جۇرگىزۋشىسى يگور گانين مەن «الماتىەلەكتروترانس» كومپانياسىنىڭ ەلەكتروبۋس جۇرگىزۋشىسى جومارت وماروۆ «ەرەن ەڭبەگى ءۇشىن» مەدالىمەن ماراپاتتالدى.
مەملەكەتتىك ناگرادالارعا مەديتسينا قىزمەتكەرلەرى مەن دەنساۋلىق ساقتاۋ ۇيىمدارىنىڭ باسشىلارى دا يە بولدى. № 7 قالالىق كلينيكالىق اۋرۋحانانىڭ دارىگەرى ۆيكتور كاراۆاەۆ پەن № 5 قالالىق كلينيكالىق اۋرۋحانانىڭ ديرەكتورى ساۋلە تولەگەنوۆا «ەرەن ەڭبەگى ءۇشىن» مەدالىمەن ماراپاتتالدى. ال № 19 قالالىق ەمحانانىڭ ديرەكتورى كامشات ايتقازينا «شاپاعات» مەدالىنە يە بولدى.
ءبىلىم بەرۋ سالاسىندا №212 مەكتەپ-گيمنازياسىنىڭ ديرەكتورى بيبىگۇل ابىشەۆا، ماحاتما گاندي اتىنداعى №92 مامانداندىرىلعان ليتسەيدىڭ ديرەكتورى كۇلجان شاجاباەۆا جانە №110 مەكتەپ-گيمنازياسىنىڭ ديرەكتورى رۋفينات الدىعازى ماراپاتقا يە بولدى. سونىمەن قاتار كولىك، ينجەنەرلىك جانە قۇرىلىس سالالارىنىڭ ماماندارى دا نازاردان تىس قالمادى.
مادەنيەت پەن ونەر وكىلدەرىنە ەرەكشە كوڭىل ءبولىندى. مۋزىكانتتارعا، تەاتر ارتيستەرىنە، كومپوزيتورلارعا، سۋرەتشىلەرگە، كينو سالاسى مەن شىعارماشىلىق ۇجىمداردىڭ وكىلدەرىنە وردەندەر مەن مەدالدار تابىستالدى. ولاردىڭ قاتارىندا «الماتى اۋەندەرى» مەملەكەتتىك كاسىپورنىنىڭ ءسوليسى قۇدايبەرگەن بەكىش بار. سونداي-اق سپورت، عىلىم، بيزنەس جانە قوعامدىق ۇيىمداردىڭ وكىلدەرى دە ماراپاتتالدى.
ۇسىنىلعان تىزىمگە سايكەس، بارلىعى 89 ادام مەملەكەتتىك ناگرادالارمەن جانە قۇرمەتتى اتاقتارمەن ماراپاتتالدى. ولاردىڭ قاتارىندا III دارەجەلى «ايبىن»، «پاراسات»، «قۇرمەت» جانە III دارەجەلى «ەڭبەك داڭقى» وردەندەرىنىڭ، «ەرەن ەڭبەگى ءۇشىن» جانە «شاپاعات» مەدالدارىنىڭ يەگەرلەرى، سونداي-اق «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعىنا يە بولعان ازاماتتار بار.
ءىس-شارا بارىسىندا الماتىنىڭ ەكونوميكالىق دامۋ ناتيجەلەرى دە ايتىلدى. قالاداعى ونەركاسىپ ءوندىرىسىنىڭ كولەمى ەكى جىل قاتارىنان 1 ترلن تەڭگەدەن اسىپ وتىر. بۇگىندە 15 شاعىن ونەركاسىپتىك پارك جۇمىس ىستەيدى، ال شاعىن جانە ورتا بيزنەس سالاسىندا 860 مىڭعا جۋىق ادام ەڭبەك ەتەدى. نەگىزگى مىندەتتەردىڭ قاتارىندا ينجەنەرلىك ينفراقۇرىلىمدى جاڭعىرتۋ، قوعامدىق كولىك جۇيەسىن جەتىلدىرۋ جانە قوعامدىق كەڭىستىكتەردى كوركەيتۋ جۇمىستارى بار.
سالتاناتتى ءراسىم سوڭىندا دارحان ساتىبالدى قاتىسۋشىلارعا كاسىبي شەبەرلىگى، ادال ەڭبەگى جانە ەل الدىنداعى سىڭىرگەن ەڭبەگى ءۇشىن العىس ءبىلدىردى.
«قازاقستاننىڭ بولاشاعى ميلليونداعان ادامنىڭ كۇندەلىكتى ەڭبەگىمەن قالىپتاسادى. ءوز مىندەتىن ادال اتقارىپ، جاقىندارىنا قامقورلىق كورسەتەتىن، وزگەلەرگە كومەكتەسىپ، قوعام يگىلىگى ءۇشىن ەڭبەك ەتەتىن ءاربىر ازامات مەملەكەتتىلىگىمىزدى نىعايتۋعا ۇلەس قوسادى. بارشا الماتىلىققا زور دەنساۋلىق، باق-بەرەكە، بەيبىت ءومىر جانە وتانىمىزدىڭ يگىلىگى جولىندا جاڭا جەتىستىكتەر تىلەيمىن. رەسپۋبليكا كۇنى قۇتتى بولسىن!» – دەپ الماتى اكىمى قالا تۇرعىندارىن قۇتتىقتادى.
رەسپۋبليكا سارايىندا رەسپۋبليكا كۇنىنە ارنالعان مەرەكەلىك كونتسەرت تە ءوتتى. سالتاناتتى باعدارلاما قازاقستان رەسپۋبليكاسىنىڭ مەملەكەتتىك ءانۇرانىن ورىنداۋمەن باستالدى. ساحنادا قازاقستاننىڭ حالىق ءارتيسى روزا رىمباەۆا، مەيرامبەك بەسباەۆ، رامازان ستامعازيەۆ، مەدەۋ ارىنباەۆ جانە باسقا دا تانىمال ونەرپازدار ونەر كورسەتتى. كونتسەرتكە قۇرمانعازى اتىنداعى قازاق ۇلتتىق حالىق اسپاپتار وركەسترى، AI Jazz Symphony وركەسترى، ب. بايقاداموۆ اتىنداعى مەملەكەتتىك حور كاپەللاسى جانە بي ۇجىمدارى قاتىستى. مەرەكەلىك باعدارلاما اياسىندا «جاسا قازاقستان»، «اتامەكەن»، «مەكەنىم قازاقستان»، «قازاق ەلى» جانە باسقا دا مۋزىكالىق ءارى حورەوگرافيالىق قويىلىمدار ۇسىنىلدى.
