Respublika künıne orai Almatyda memlekettık nagradalardy tapsyru räsımı öttı. Qala äkımı Darhan Satybaldy Qazaqstan Prezidentı Qasym-Jomart Toqaevtyŋ atynan memlekettık jäne qoǧamdyq qyzmettegı eŋbegı, eldıŋ äleumettık-ekonomikalyq jäne mädeni damuyna qosqan ülesı, halyqtar arasyndaǧy dostyq pen yntymaqtastyqty nyǧaituǧa sıŋırgen eŋbegı üşın 89 almatylyqty marapattady.
Marapat ielerınıŋ qatarynda önerkäsıp, kommunaldyq şaruaşylyq, medisina, bılım beru, mädeniet jäne sport salalarynyŋ ökılderı bar.
Qala basşysy qūttyqtau sözınde 1990 jylǧy 25 qazanda Almatyda Qazaq KSR-ınıŋ Memlekettık egemendıgı turaly deklarasiia qabyldanǧan künnıŋ erekşe tarihi maŋyzyna toqtaldy. Būl qūjat Qazaqstannyŋ derbes memleket retınde qalyptasuynyŋ saiasi-qūqyqtyq negızın qalap, eldıŋ odan ärı damu jolyn aiqyndady.
«Respublika künı – memlekettılıgımızdıŋ, bırlıgımız ben el bolaşaǧyna degen ortaq jauapkerşılıgımızdıŋ simvoly. Qazaqstan Respublikasynyŋ Prezidentı Qasym-Jomart Toqaev būl merekenıŋ ūlttyq ruhty, memlekettılıktı, qoǧamdaǧy bırlık pen kelısımdı nyǧaitatynyn atap ötken bolatyn. Bügınde osy qūndylyqtardy saqtau, är adamnyŋ eŋbegın qūrmetteu jäne Qazaqstannyŋ odan ärı damuy jolynda bırlese jūmys ısteu airyqşa maŋyzdy», – dedı Darhan Satybaldy.
Onyŋ aituynşa, Almatynyŋ ekonomikalyq körsetkışterı tūraqty ösıp keledı. Qala ekonomikasynyŋ kölemı 72 mlrd dollarǧa juyqtap, jan basyna şaqqandaǧy jalpy öŋırlık önım 30 myŋ dollardan asty.
Darhan Satybaldy käsıporyndardyŋ, kommunaldyq qyzmetterdıŋ, kölık jüiesınıŋ, medisinalyq jäne bılım beru ūiymdarynyŋ jūmysyn qamtamasyz etıp jürgen azamattardyŋ eŋbegın erekşe atap öttı. Olardyŋ qatarynda injenerler, qūrylysşylar, käsıpkerler jäne basqa da mamandyq ielerı bar.
«Almatynyŋ basty küşı – onyŋ tūrǧyndary. Olar mındetın adal atqaryp, balalarǧa bılım beretın, adam ömırıne araşa tüsetın, qalalyq qyzmetterdıŋ üzdıksız jūmysyn qamtamasyz etetın, jaŋa käsıporyndar aşyp, mädeniettı damytady. Olardyŋ jauapkerşılıgı men öz ısıne degen adaldyǧynyŋ arqasynda qalamyz damyp, jaŋa mümkındıkterge jol aşylyp keledı. Eŋbek adamyna qūrmet körsetu qoǧamymyzdyŋ basty qūndylyqtarynyŋ bırı bolyp qaluǧa tiıs», – dedı Almaty äkımı.
Saltanatty räsımde türlı buyn ökılderı men är sala mamandary marapattaldy. Olardyŋ qatarynda önerkäsıp jäne kommunaldyq käsıporyndardyŋ qyzmetkerlerı, därıgerler, pedagogter, ǧalymdar, mädeniet pen öner qairatkerlerı, sportşylar, käsıpkerler jäne qoǧam qairatkerlerı bar.
Atap aitqanda, öndırıstık jäne tehnikalyq sala mamandary – «Almaty Qala Jaryq» kompaniiasynyŋ tehnikalyq qyzmet körsetu mamany Maqūlbek Küzembaev, «Almatyjylujaienergo» käsıpornynyŋ slesarı Konstantin Popov jäne «AKQZ» käsıpornynyŋ tehnikalyq direktory Tugluk Hudaiberdiev III därejelı «Eŋbek Daŋqy» ordenımen marapattaldy.
Kommunaldyq infraqūrylym men qoǧamdyq kölık salasynyŋ ökılderı, sonyŋ ışınde «Almaty tazalyq» käsıpornynyŋ arnaiy tehnika jürgızuşısı İgor Ganin men «Almatyelektrotrans» kompaniiasynyŋ elektrobus jürgızuşısı Jomart Omarov «Eren eŋbegı üşın» medalımen marapattaldy.
Memlekettık nagradalarǧa medisina qyzmetkerlerı men densaulyq saqtau ūiymdarynyŋ basşylary da ie boldy. № 7 qalalyq klinikalyq auruhananyŋ därıgerı Viktor Karavaev pen № 5 qalalyq klinikalyq auruhananyŋ direktory Säule Tölegenova «Eren eŋbegı üşın» medalımen marapattaldy. Al № 19 qalalyq emhananyŋ direktory Kämşat Aitqazina «Şapaǧat» medalıne ie boldy.
Bılım beru salasynda №212 mektep-gimnaziiasynyŋ direktory Bibıgül Äbışeva, Mahatma Gandi atyndaǧy №92 mamandandyrylǧan liseidıŋ direktory Küljan Şajabaeva jäne №110 mektep-gimnaziiasynyŋ direktory Rufinat Äldıǧazy marapatqa ie boldy. Sonymen qatar kölık, injenerlık jäne qūrylys salalarynyŋ mamandary da nazardan tys qalmady.
Mädeniet pen öner ökılderıne erekşe köŋıl bölındı. Muzykanttarǧa, teatr artisterıne, kompozitorlarǧa, suretşılerge, kino salasy men şyǧarmaşylyq ūjymdardyŋ ökılderıne ordender men medaldar tabystaldy. Olardyŋ qatarynda «Almaty äuenderı» memlekettık käsıpornynyŋ solisı Qūdaibergen Bekış bar. Sondai-aq sport, ǧylym, biznes jäne qoǧamdyq ūiymdardyŋ ökılderı de marapattaldy.
Ūsynylǧan tızımge säikes, barlyǧy 89 adam memlekettık nagradalarmen jäne qūrmettı ataqtarmen marapattaldy. Olardyŋ qatarynda III därejelı «Aibyn», «Parasat», «Qūrmet» jäne III därejelı «Eŋbek Daŋqy» ordenderınıŋ, «Eren eŋbegı üşın» jäne «Şapaǧat» medaldarynyŋ iegerlerı, sondai-aq «Qazaqstannyŋ eŋbek sıŋırgen qairatkerı» qūrmettı ataǧyna ie bolǧan azamattar bar.
Is-şara barysynda Almatynyŋ ekonomikalyq damu nätijelerı de aityldy. Qaladaǧy önerkäsıp öndırısınıŋ kölemı ekı jyl qatarynan 1 trln teŋgeden asyp otyr. Bügınde 15 şaǧyn önerkäsıptık park jūmys ısteidı, al şaǧyn jäne orta biznes salasynda 860 myŋǧa juyq adam eŋbek etedı. Negızgı mındetterdıŋ qatarynda injenerlık infraqūrylymdy jaŋǧyrtu, qoǧamdyq kölık jüiesın jetıldıru jäne qoǧamdyq keŋıstıkterdı körkeitu jūmystary bar.
Saltanatty räsım soŋynda Darhan Satybaldy qatysuşylarǧa käsıbi şeberlıgı, adal eŋbegı jäne el aldyndaǧy sıŋırgen eŋbegı üşın alǧys bıldırdı.
«Qazaqstannyŋ bolaşaǧy milliondaǧan adamnyŋ kündelıktı eŋbegımen qalyptasady. Öz mındetın adal atqaryp, jaqyndaryna qamqorlyq körsetetın, özgelerge kömektesıp, qoǧam igılıgı üşın eŋbek etetın ärbır azamat memlekettılıgımızdı nyǧaituǧa üles qosady. Barşa almatylyqqa zor densaulyq, baq-bereke, beibıt ömır jäne Otanymyzdyŋ igılıgı jolynda jaŋa jetıstıkter tıleimın. Respublika künı qūtty bolsyn!» – dep Almaty äkımı qala tūrǧyndaryn qūttyqtady.
Respublika saraiynda Respublika künıne arnalǧan merekelık konsert te öttı. Saltanatty baǧdarlama Qazaqstan Respublikasynyŋ Memlekettık Änūranyn oryndaumen bastaldy. Sahnada Qazaqstannyŋ halyq artisı Roza Rymbaeva, Meirambek Besbaev, Ramazan Stamǧaziev, Medeu Arynbaev jäne basqa da tanymal önerpazdar öner körsettı. Konsertke Qūrmanǧazy atyndaǧy Qazaq ūlttyq halyq aspaptar orkestrı, AI Jazz Symphony orkestrı, B. Baiqadamov atyndaǧy Memlekettık hor kapellasy jäne bi ūjymdary qatysty. Merekelık baǧdarlama aiasynda «Jasa Qazaqstan», «Atameken», «Mekenım Qazaqstan», «Qazaq Elı» jäne basqa da muzykalyq ärı horeografiialyq qoiylymdar ūsynyldy.
