فوتو: سپورت جانە تۋريزم مينيسترلىگى
جاپونيانىڭ ايتي پرەفەكتۋراسى مەن ناگويا قالاسىندا ءوتىپ جاتقان ازيا پارا ويىندارىندا قازاقستان قۇراماسى تاعى بەس مەدال جەڭىپ الدى. بۇل تۋرالى ۇلتتىق وليمپيادا كوميتەتىنىڭ ءباسپاسوز قىزمەتى حابارلادى، دەپ جازادى “ادىرنا”.
«جاپونيانىڭ ايتي پرەفەكتۋراسى مەن ناگويا قالاسىندا ءوتىپ جاتقان ازيا پارا ويىندارىندا قازاقستان قۇراماسىنىڭ قورجىنى تاعى بىرنەشە جۇلدەمەن تولىقتى»، – دەلىنگەن جۇما كۇنى جاريالانعان حابارلامادا.
ۇلتتىق وليمپيادا كوميتەتىنىڭ مالىمەتىنشە، پارادزيۋدودان 95 كەلىگە دەيىنگى سالماق دارەجەسىندە، J2 كلاسىندا سىنعا تۇسكەن جانبوتا امانجول كۇمىس مەدال يەلەندى.
ساداق اتۋدان W1 كلاسىنداعى ەرلەر اراسىنداعى جارىستا نۇرشات تولەۋقاسىم قولا جۇلدەگەر اتاندى. ءۇشىنشى ورىن ءۇشىن وتكەن كەزدەسۋدە قازاقستاندىق سپورتشى تايلاند وكىلى سۋپحاۆات سامۋتچاياكيدجدى 6:2 ەسەبىمەن جەڭدى.
يادرو لاقتىرۋدان F36 كلاسىندا قازاقستان قۇراماسىنىڭ قورجىنى تاعى ەكى مەدالمەن تولىقتى. داستان مۇقاشبەكوۆ 15,47 مەتر ناتيجەمەن كۇمىس مەدال جەڭىپ السا، يۆان زەلەزنياك 12,71 مەتر كورسەتكىشپەن قولا جۇلدەگە قول جەتكىزدى.
سونداي-اق پاراۇستەل تەننيسىنەن مارات سۇرتباەۆ پەن التىناي ەرجانقىزى قازاقستان قۇراماسىنا تاعى ەكى قولا مەدال سىيلادى.
ارالاس جۇپتىق سىندا XD20 كلاسىندا ونەر كورسەتكەن قازاقستاندىق جۇپ جارتىلاي فينالدا گونكونگ سپورتشىلارى لام يان يۋ مەن ۆونگ حون لامعا ەسە جىبەردى. قارسىلاستار ءۇش سەتتە دە باسىم ءتۇسىپ، 11:7, 11:4 جانە 11:8 ەسەبىمەن جەڭىسكە جەتتى. وسىلايشا، قازاقستاندىق سپورتشىلار قولا مەدال يەلەندى.
وسى ناتيجەلەردەن كەيىن قازاقستان قۇراماسىنىڭ قورجىنىنداعى مەدال سانى 41-گە جەتتى. ونىڭ ىشىندە 10 التىن، 12 كۇمىس جانە 19 قولا مەدال بار.
