قورعانىس مينيسترلىگى جەلىدە قىزۋ تالقىلانعان مينيستر مەن وتباسىنىڭ سۋرەتىنە قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
قورعانىس ءمينيسترى رۋسلان جاقسىلىقوۆتىڭ وتباسىمەن تۇسكەن فوتوسى استاناداعى فوتوستۋديانىڭ پاراقشاسىندا تامىز ايىندا جاريالانعان. وندا سۋرەتتىڭ ءمينيستردىڭ رۇقساتىمەن جاريالانعانى ايتىلعان. الايدا سول كەزدە مينيسترلىك تاراپىنان فوتوعا قاتىستى تۇسىندىرمە بولمادى. تەك بۇگىن ءماجىلىس كۋلۋارىندا قورعانىس مينيسترلىگىنىڭ رەسمي وكىلى رۋسلان جانعۋلين فوتوسەسسياعا قاتىستى پىكىر ءبىلدىردى.
گەنەرال-پولكوۆنيك رۋسلان جاقسىلىقوۆتىڭ جۇبايى جانە 3 بالاسىمەن اسكەري كيىم كيىپ، مەدالدارمەن فوتوسەسسيا جاساعانىن كورۋگە بولادى. كوپشىلىك 58 جاستاعى ءمينيستردىڭ ايەلىنىڭ وزىنەن الدەقايدا جاس ەكەنىنە نازار اۋدارىپ، تاڭدانا پىكىر جازعان. دەرەككوزدە جاقسىلىقوۆتىڭ ايەلى ۇلتتىق ۇلاندا ءبيشى ەكەنى، ەسىمى ەلميرا ەكەنى انىقتالعان. گەنەرال-پولكوۆنيكتىڭ ايەلى دە اسكەري شەنگە يە.
قورعانىس مينيسترلىگىنىڭ ءباسپاسوز قىزمەتى ءمينيستردىڭ وتباسىلىق فوتوسەسسياسىنا قاتىستى رەسمي ساۋالعا جاۋاپ بەرمەدى. ال جەلى وقىرماندارى قورعانىس ءمينيسترىنىڭ ايەلىندە وسىنشا كوپ مەدالدىڭ قايدان ەكەنىن بىلۋگە اسىققان. كەيىننەن قورعانىس مينيسترلىگىنىڭ رەسمي وكىلى رۋسلان جانعۋلين:
«قورعانىس ءمينيسترىنىڭ وتباسىلىق فوتوسۋرەتتەرى ونىڭ رەسمي قىزمەتىنە قاتىسى جوق ەكەنىن ايتامىن. مەدالدارعا كەلەتىن بولساق، قورعانىس ءمينيسترىنىڭ ايەلى دە اسكەري قىزمەتشى. ءمينيستردىڭ ايەلى تاققان مەدالدار ۇلتتىق ۇلان مەن مەرەيتويلىق ماراپاتتار»، - دەدى قورعانىس مينيسترلىگىنىڭ وكىلى.
ايتا كەتەيىك، ءبىر جىلدىڭ ىشىندە قازاق اسكەرىندە ادام شىعىنى كوبەيگەن. ودان بولەك، اسكەردەگى الىمجەتتىك ماسەلەسى دە ءورشىپ تۇرعانى بەلگىلى.
رۋسلان جاقسىلىقوۆ قاڭتار وقيعاسىنان كەيىن 2022 جىلعى 19 قاڭتاردان باستاپ قورعانىس ءمينيسترى بولىپ تاعايىندالعان بولاتىن.
2022 جىلعى مامىردا گەنەرال-پولكوۆنيك اتاعىن العان.
