شىمكەنتتە زاڭسىز ەسىرتكى ساقتاۋ دەرەگىنە قاتىستى جۇرگىزىلگەن جەدەل ءىس-شارالاردان كەيىن پوليتسيا قىزمەتكەرى ىشكى ىستەر ورگاندارىنان تەرىس سەبەپتەرمەن جۇمىستان شىعارىلدى، دەپ حابارلايدى “ادىرنا”.
بۇل تۋرالى قالالىق پوليتسيا دەپارتامەنتىنىڭ ءباسپاسوز قىزمەتى حابارلادى.
بۇعان دەيىن بۇقارالىق اقپارات قۇرالدارىندا مەملەكەتتىك تىركەۋ ءنومىرى جوق Kia اۆتوكولىگىن پوليتسيا قىزمەتكەرلەرى توقتاتۋعا تىرىسقانى تۋرالى اقپارات تاراعان. الايدا جۇرگىزۋشى پوليتسيانىڭ قىزمەتتىك كولىگىنە سوعىلىپ، وقيعا ورنىنان قاشۋعا ارەكەت جاساعان. كەيىن كولىك ارنايى جاساق قىزمەتكەرلەرىنىڭ كومەگىمەن توقتاتىلعان.
الدىن الا مالىمەت بويىنشا، كولىك تىزگىنىندە ەڭبەكشى اۋداندىق پوليتسيا بولىمشەسىنىڭ قىزمەتكەرى بولعان. سالوندا تاعى ەكى ادام وتىرعان. تەكسەرۋ بارىسىندا اۆتوكولىكتەن شامامەن ءۇش گرامم مەفەدرون تابىلعانى حابارلاندى.
شىمكەنت قالالىق پوليتسيا دەپارتامەنتىنىڭ مالىمەتىنشە، ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى جەدەل ءىس-شارالار بارىسىندا ەسىرتكى زاتتارىن زاڭسىز ساقتاۋ دەرەگىن انىقتاعان. سونىمەن قاتار كولىكتە ازاماتتىق تۇلعالارمەن بىرگە اۋداندىق بولىمشەلەردىڭ بىرىندە قىزمەت ەتەتىن پوليتسەيدىڭ بولعانى بەلگىلى بولعان.
«اتالعان قىزمەتكەر ىشكى ىستەر ورگاندارىنان تەرىس سەبەپتەرمەن جۇمىستان شىعارىلدى»، – دەپ حابارلادى ۆەدومستۆونىڭ ءباسپاسوز قىزمەتى.
قازىر وقيعاعا قاتىستى قاجەتتى تەرگەۋ ارەكەتتەرى جۇرگىزىلىپ جاتىر. پوليتسيانىڭ مالىمەتىنشە، بۇرىنعى قىزمەتكەردىڭ ارەكەتتەرىن قوسا العاندا، وقيعانىڭ بارلىق ءمان-جايىنا قۇقىقتىق باعا بەرىلەدى.
