Şymkentte zaŋsyz esırtkı saqtau deregıne qatysty jürgızılgen jedel ıs-şaralardan keiın polisiia qyzmetkerı ışkı ıster organdarynan terıs sebeptermen jūmystan şyǧaryldy, dep habarlaidy “Adyrna”.
Būl turaly qalalyq polisiia departamentınıŋ baspasöz qyzmetı habarlady.
Būǧan deiın būqaralyq aqparat qūraldarynda memlekettık tırkeu nömırı joq Kia avtokölıgın polisiia qyzmetkerlerı toqtatuǧa tyrysqany turaly aqparat taraǧan. Alaida jürgızuşı polisiianyŋ qyzmettık kölıgıne soǧylyp, oqiǧa ornynan qaşuǧa äreket jasaǧan. Keiın kölık arnaiy jasaq qyzmetkerlerınıŋ kömegımen toqtatylǧan.
Aldyn ala mälımet boiynşa, kölık tızgınınde Eŋbekşı audandyq polisiia bölımşesınıŋ qyzmetkerı bolǧan. Salonda taǧy ekı adam otyrǧan. Tekseru barysynda avtokölıkten şamamen üş gramm mefedron tabylǧany habarlandy.
Şymkent qalalyq polisiia departamentınıŋ mälımetınşe, Ūiymdasqan qylmysqa qarsy küres basqarmasynyŋ qyzmetkerlerı jedel ıs-şaralar barysynda esırtkı zattaryn zaŋsyz saqtau deregın anyqtaǧan. Sonymen qatar kölıkte azamattyq tūlǧalarmen bırge audandyq bölımşelerdıŋ bırınde qyzmet etetın poliseidıŋ bolǧany belgılı bolǧan.
«Atalǧan qyzmetker ışkı ıster organdarynan terıs sebeptermen jūmystan şyǧaryldy», – dep habarlady vedomstvonyŋ baspasöz qyzmetı.
Qazır oqiǧaǧa qatysty qajettı tergeu äreketterı jürgızılıp jatyr. Polisiianyŋ mälımetınşe, būrynǧy qyzmetkerdıŋ äreketterın qosa alǧanda, oqiǧanyŋ barlyq män-jaiyna qūqyqtyq baǧa berıledı.
