Halyk پەن جاساندى ينتەللەكت جانە تسيفرلىق دامۋ مينيسترلىگى جاساندى ينتەللەكت، مەملەكەتتىك قىزمەتتەر جانە ازاماتتار مەن بيزنەسكە ارنالعان تسيفرلىق سەرۆيستەر سالالارىنداعى بىرلەسكەن جوبالاردى دامىتۋدى جوسپارلاپ وتىر.
نەگىزگى باستامالار قاتارىندا Halyk AI Lab زەرتحاناسىن قۇرۋ، اگرارلىق سالاعا ارنالعان Halyk فەرمەر تسيفرلىق سەرۆيسىن دامىتۋ، الماتىدا جاڭا فورماتتاعى حالىققا قىزمەت كورسەتۋ ورتالىعىن اشۋ جانە Halyk سەرۆيستەرىن eGov Business پلاتفورماسىمەن ودان ءارى ينتەگراتسيالاۋ بار.
ىنتىماقتاستىقتىڭ پەرسپەكتيۆالى باعىتتارىن پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ پەن Halyk باسقارما ءتورايىمى ءۇمىت شاياحمەتوۆا تالقىلادى.
تاراپتار ازاماتتار مەن كاسىپكەرلەردىڭ مەملەكەتپەن ءوزارا ءىس-قيمىلىن جەڭىلدەتۋگە، قولمەن ورىندالاتىن وپەراتسيالار سانىن ازايتۋعا جانە قىزمەت الۋ ۋاقىتىن قىسقارتۋعا مۇمكىندىك بەرەتىن تسيفرلىق شەشىمدەردى قاراستىردى. سونىمەن قاتار Halyk بانك سەرۆيستەرىن مەملەكەتتىك تسيفرلىق پلاتفورمالارمەن ودان ءارى ينتەگراتسيالاۋ مۇمكىندىكتەرى تالقىلاندى.
«مىندەت – قولدانىستاعى پروتسەستەردى جاي عانا تسيفرلىق فورماتقا كوشىرۋ ەمەس. ادامدار مەن بيزنەستىڭ ناقتى قاجەتتىلىكتەرىنە ساي كەلەتىن، قاراپايىم، جىلدام ءارى كۇندەلىكتى قولدانىلاتىن تسيفرلىق ارنالار ارقىلى قولجەتىمدى سەرۆيستەر قۇرۋ قاجەت. Halyk-ءتىڭ اۋقىمدى تەحنولوگيالىق ينفراقۇرىلىمى مەن ميلليونداعان پايدالانۋشىسى بار. سوندىقتان مەملەكەت پەن بيزنەستىڭ مۇمكىندىكتەرىن بىرىكتىرۋدىڭ الەۋەتى زور دەپ سانايمىز. بۇل جاساندى ينتەللەكت نەگىزىندەگى شەشىمدەردى جىلدام ەنگىزۋگە، مەملەكەتتىك تسيفرلىق قىزمەتتەردى دامىتۋعا جانە كاسىپكەرلەرگە، فەرمەرلەرگە، سونداي-اق ميلليونداعان قازاقستاندىققا ارنالعان جاڭا سەرۆيستەر جاساۋعا مۇمكىندىك بەرەدى»، – دەدى Halyk باسقارما ءتورايىمى ءۇمىت شاياحمەتوۆا.
Halyk AI Lab: جاساندى ينتەللەكت شەشىمدەرىن ازىرلەۋ جانە ەنگىزۋ
ىنتىماقتاستىقتىڭ پەرسپەكتيۆالى باعىتتارىنىڭ ءبىرى – Alem.ai بازاسىندا Halyk AI Lab زەرتحاناسىن قۇرۋ. جوبا جاساندى ينتەللەكت نەگىزىندەگى شەشىمدەردى ازىرلەۋگە، سىناقتان وتكىزۋگە جانە كەيىننەن اۋقىمىن كەڭەيتۋگە ارنالعان الاڭ رەتىندە قاراستىرىلىپ وتىر.
Halyk AI Lab تەحنولوگيالىق كوماندالاردى، ستارتاپتاردى جانە اكادەميالىق قاۋىمداستىقتى بىرىكتىرەدى دەپ جوسپارلانۋدا. جۇمىس باعىتتارىنا حاكاتوندار وتكىزۋ، ستارتاپ جوبالارىن دامىتۋ، Astana IT University-مەن بىرلەسكەن ءبىلىم بەرۋ باعدارلامالارىن جۇزەگە اسىرۋ، سونداي-اق جاساندى ينتەللەكت شەشىمدەرىن ازىرلەۋ مەن سىناقتان وتكىزۋ ءۇشىن يەسىزدەندىرىلگەن دەرەكتەردى پايدالانۋ كىرەدى.
«Digital Bridge الاڭىندا ماڭىزدى تسيفرلىق جوبالاردىڭ دامۋىنا سەرپىن بەرەتىن شەشىمدەردىڭ قابىلدانۋى اسا ماڭىزدى. مۇندا مەملەكەت پەن بيزنەس ناقتى باستامالاردى تالقىلاپ، بىرلەسكەن جۇمىس جونىندە كەلىسەدى. Halyk-پەن ىنتىماقتاستىق جاساندى ينتەللەكتىنى ەنگىزۋگە، مەملەكەتتىك قىزمەتتەردى دامىتۋعا جانە ازاماتتارعا، كاسىپكەرلەر مەن فەرمەرلەرگە قولايلى تسيفرلىق سەرۆيستەر قۇرۋعا مۇمكىندىك بەرەدى. ءبىزدىڭ ورتاق مىندەتىمىز – وسى باستامالاردى ادامداردىڭ ۋاقىتىن ۇنەمدەيتىن، بيزنەستى جۇرگىزۋدى جەڭىلدەتەتىن جانە قىزمەتتەردىڭ قولجەتىمدىلىگىن ارتتىراتىن ناقتى شەشىمدەرگە اينالدىرۋ»، – دەپ اتاپ ءوتتى پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ.
مۇنداي فورمات يدەيانى قالىپتاستىرۋدان باستاپ مامانداردى دايارلاۋ، تەحنولوگيانى سىناقتان وتكىزۋ جانە ونى تاجىريبەدە قولدانۋعا دەيىنگى تولىق تسيكلدى ۇيىمداستىرۋعا مۇمكىندىك بەرەدى.
Halyk فەرمەر: اگرارلىق سالاعا ارنالعان بىرىڭعاي تسيفرلىق سەرۆيس
كەزدەسۋدىڭ جەكە ءبىر بولىگى اگرارلىق سەكتورعا ارنالعان بىرىڭعاي تسيفرلىق ورتانى قۇرۋدى كوزدەيتىن Halyk فەرمەر جوباسىنا ارنالدى.
جوبا بىرىڭعاي IT-ارحيتەكتۋرا قالىپتاستىرۋدى، دەرەكتەردى بىرىكتىرۋدى جانە اۋىل شارۋاشىلىعى سالاسىنداعى نەگىزگى مەملەكەتتىك قىزمەتتەردى قايتا ۇيىمداستىرۋدى قامتيدى.
ماقسات – فەرمەرلەردىڭ قاجەتتى قىزمەتتەردى الۋىن جەڭىلدەتىپ، جەدەلدەتۋ، ءارتۇرلى جۇيەلەرمەن جۇمىس ىستەۋ جانە ءبىر اقپاراتتى بىرنەشە رەت ۇسىنۋ قاجەتتىلىگىن ازايتۋ.
بولاشاقتا ازىرلەنگەن شەشىمدەر ءارتۇرلى مەملەكەتتىك جانە كوممەرتسيالىق تسيفرلىق ارنالار ارقىلى قولجەتىمدى بولادى. بۇل قىزمەتتەردىڭ قامتۋ اياسىن كەڭەيتىپ، بۇكىل ەلدەگى اۋىل شارۋاشىلىعى وندىرۋشىلەرى ءۇشىن ولاردى پايدالانۋدى جەڭىلدەتۋگە مۇمكىندىك بەرەدى.
Halyk جانە eGov Business: بيزنەسكە ارنالعان تسيفرلىق سەرۆيستەر
ىنتىماقتاستىقتىڭ تاعى ءبىر باعىتى – Halyk پەن eGov Business اراسىنداعى بىرلەسكەن سەرۆيستەردى ودان ءارى دامىتۋ. ولار كاسىپكەردىڭ كومپانيانى تىركەۋدەن باستاپ كۇندەلىكتى قارجىلىق وپەراتسيالار جۇرگىزۋ مەن قارجىلاندىرۋ الۋعا دەيىنگى نەگىزگى قاجەتتىلىكتەرىن قامتۋى ءتيىس.
قاراستىرىلىپ جاتقان شەشىمدەر قاتارىندا بيزنەستى تىركەۋمەن قاتار بانكتىك شوت اشۋ، دەرەكتەمەلەردى قولمەن ەنگىزبەي-اق سالىقتار مەن الەۋمەتتىك تولەمدەردى جۇرگىزۋ، وكىلەتتىكتەردى تسيفرلىق فورماتتا باسقارۋ، بانكتىك كەپىلدىكتەردى راسىمدەۋ، قارجىلاندىرۋ الۋ بار.
بانكتىك جانە مەملەكەتتىك سەرۆيستەردى ينتەگراتسيالاۋ جەكە راسىمدەردىڭ سانىن قىسقارتىپ، كاسىپكەرلەرگە مەملەكەتپەن جانە قارجى ينستيتۋتتارىمەن ءوزارا ءىس-قيمىل جاساۋدىڭ ىڭعايلى تسيفرلىق جولىن قالىپتاستىرۋعا مۇمكىندىك بەرەدى.
Halyk SuperApp-تىڭ 8,6 ميلليون پايدالانۋشىسى بار
قازىرگى ۋاقىتتا Halyk قازاقستانداعى ەڭ ءىرى تسيفرلىق ەكوجۇيەلەردىڭ ءبىرىن قالىپتاستىرعان. Halyk SuperApp قوسىمشاسىنىڭ اي سايىنعى اۋديتورياسى 8,6 ميلليون پايدالانۋشىنى قۇرايدى.
بۇگىندە قوسىمشادا 82 مەملەكەتتىك قىزمەت قولجەتىمدى. بۇل پايدالانۋشىلارعا قاجەتتى سەرۆيستەردى وزدەرى ۇيرەنگەن تسيفرلىق ارنا ارقىلى الۋعا مۇمكىندىك بەرەدى. 2026 جىلى Halyk قوسىمشاسىنداعى مەملەكەتتىك قىزمەتتەر ءبولىمىنىڭ اي سايىنعى اۋديتورياسى 1,3 ميلليون پايدالانۋشىعا جەتكەن.
تسيفرلىق ينفراقۇرىلىم مەن پايدالانۋشىلار اۋديتورياسىنىڭ اۋقىمى جاڭا سەرۆيستەردى جىلدام ەنگىزۋگە، حالىق پەن بيزنەستىڭ مەملەكەتتىك قىزمەتتەرگە قولجەتىمدىلىگىن كەڭەيتۋگە مۇمكىندىك بەرەدى.
كەزدەسۋ قورىتىندىسى بويىنشا تاراپتار باستامالاردى بىرلەسىپ پىسىقتاۋدى جالعاستىرۋعا، ءوزارا ءىس-قيمىل تەتىكتەرىن ايقىنداۋعا جانە باسىم جوبالار بويىنشا جول كارتالارىن ازىرلەۋگە كەلىستى.
